amalinks wokungena

Zizabhalisa Na Izizalwane zeZimbabwe Ezihlala eSouth Africa Kugwalo Lokuvota?

  • Bennedict Nhlapho

Kazithokozi ngitsho lakancane izizalwane zeZimbabwe kwele South Africa ngohlelo lokubhalisela ukuvota olusungulwe mhlaka 10 Mfumfu.

Inengi lithi ngemva kweminyaka eminengi kukhankaselwa ukuthi abasemazweni labo bavunyelwe ukuvota, bebelethemba lokuthi bazaphiwa ithuba lokubhalisa ukuvota emawofisini omeli weZimbabwe kwele South Africa.

Ukwehluleka kukahulumende ukugcwalisa isifiso sabo lesi kuzavalela phandle abanengi njengoba abaqhatshi babo bengeke bavume ukubapha ithuba lokuya ekhaya besiyabhalisela ukuvota, kanti kuzabuya kudingeke njalo ukuthi babaphe ithuba lokuyavota.

Isizalwane seZimbabwe esikhethe ukwaziwa ngokuthi ngumalayitsha eJohannesburg ngomunye wabanengi abathi sebezwile ngokuqala kwaloluhlelo eZimbabwe. Yena-ke uthi kangeke ayebhalisa ngoba kukhanye uhulumende evele engafuni ukuthi abasemazweni baphathake.

“Ngeke siyekhona. Konke lokhu okuthiwa kuvotwa nge electronic ngeke ngikukholwe ngoba angikwazi ukuthi kwenziwa njani ngecomputer. Thina sasisazi ukusayina phansi uX. Konke lokhu yiburobani kuphela.”

Kodwa-ke akusibo bonke asebedelile ukuyabhalisela ukuvota. Bakhona abathi ukukhalala ngezenzo zikahulumende akusoke kubasize ngalutho ngakho bazenza konke abakwenelisayo ukuthi bayebhalisa ukuze bangakhuthwa lukhetho luka 2018.

Isizalwane seZimbabwe, uMnu. Edgar Ndlela, uthi wavota ekhethweni olwedlulayo ngakho lakhathesi uzaqinisekisa ukuthi uyabhalisa.

Impicabadala kwabanengi ludaba lokuvota ngohlelo lweBiometric Voter Registration (BVR). Abanye bathi loluhlelo yibuqili obusegcekeni. Abanye njalo bathi umangoye uyasola ngokuthi lukhokhelwa yinkampani yakweleChina abathi ilobudlelwano besingundengunde lohulumende weZimbabwe.

Intathelizindaba yeZimbabwe, uNdumiso Mlilo, uthi okunye okwengeza ukungathenjwa kwaloluhlelo yikuthi sekulobufakazi ukuthi emazweni athile alusebenzanga ngendlela esuthisayo.

“Inhlelo ezifana lale vele azithembakalanga njengoba sesike sakubona eUnited States of America njalo sikubonile eKenya ukuthi kuyatholakala ukuthi kuyabe kungaqhutshwanga ngendlela eqondileyo.”

Omunye wenkokheli zentsha kubandla leMDC-T kwele South Africa, uNkosazana Vimbai Mavherudze, uthi sebeze leqhinga elizasiza abalutshwana ngemva kokubona ukuthi uhulumende uzimisele ukuthi abasemazweni bangaphatheki kulolukhetho.

“Udaba lolu lokuregister ukuvota besicabanga ukuthi sizathola idiaspora vote, asizange sikwazi ukuyithola. So, okwamanje siyahamba ngobunengi bethu siye eBeitbridge, siye eGwanda or eMasvingo lapha eduze neborder siye register ukuvota.”

Ngakwelinye icele, bakhona abathi ukuvota eZimbabwe yikudlalisa isikhathi njengoba selokhu kwavotwa kusukela ngo1980 akulanguquko esibe khona.

Bakhona-ke abathi lobanje bona bengazukuyabhalisela ukuvota, baphakathi kokukhuthaza izihlobo zabo eziseZimbabwe ukuthi ziyebhalisa ukuze funa amavothi abo adale utshitsho abalufunayo ngemva kokhetho luka2018.

Facebook Forum

XS
SM
MD
LG