Umphathintambo kahulumende wakwele South Africa, obona ngezemithetho lokuvalelwa kwabantu entilongweni, namuhla wethekelele uMnu. Jacob Zuma, owayengumongameli walelolizwe, ovalelwe entilongweni izolo ebusuku.
UMnu. Ronald Lamola, ophethe uhlangothi olubona ngezemithetho lokuvalelwa kwabantu entilongweni, ubambisane indlela loMnu. Arthur Fraser, okuhlangothi lweNational Correctional Services, bayakhuluma loZuma osentilongweni yeEscourt Correctional Services Center.
Umsakazo weSouth African Broadcasting Corporation awuvezanga ukuba ababili laba bakhulume ngani loZuma. Ubika njalo ukuba uZuma ulakho ukuphuma entilongweni sokwenele inyanga ezintathu lamaviki amathathu nxa elandela kahle imithetho yentilongweni njalo ehlonipha abasebenza kuleyondawo.
Okwamanje uMongameli Cyril Ramaphosa, kakakhulumi ngokuvalelwa kuka Zuma, ozihambise emapholiseni emadabukakusa. Wagwetshwa yinkantolo yeConstitutional Court ukuba avalelwe entilongweni inyanga ezilitshumi lanhlanu.
Ingqwetha elilwela amalungelo kazulu, uMnu. Nqobani Sithole, uthi okwenziwe yiziphathamandla zikahulumende ezethekelele uZuma kuveza ukuba uyindoda emadodeni.
USithole uthi okwenzakala kuZuma kuveza ukuba iyahlonitshwa imithetho kwele South Africa.
Elinye njalo ingqwetha elilwela amalungelo kazulu, uMnu. Matshobana Ncube, uthi kunengi okumele kwenziwe nguZuma nxa efuna ukukhululwa entilongweni.
UNcube uthi uZuma ulakho njalo ukukhululwa entilongweni nguRamaphosa.
Okwamanje uZuma uphanyeke enkantolo isicelo esokuthi engavalelwe entilongweni njalo kwesulwe isigwebo esethulwa yinkantolo yeConstitutional Court eyathi wadelela umthethwandaba kulandela ukwala kwakhe ukuyamiswa phambi kwekhomishini ehlolisisa amacala obukhohlakali awetheswayo.
Inkampani yezindaba eyeNews24 ibika ukuba kulesisebenzi seEscourt Correctional Services Center esesibotshiwe kulandela ukuthatha kwaso imifanekiso kaZuma engeniswa kulayondawo waseyihaza enkundleni bokuxhumana.