Kuyaxokozela emzini kaMnu. Jacob Zuma, owayengumongameli wakwele South Africa, osephanyeke emthethwandaba udaba lwesigwebo asethulelwe yinkantolo yeConstitutional Court ethi kumele avalelwe entilongweni inyanga ezilitshumi lanhlanu – 15 months ngenxa yokuthi wadelela inkantolo.
Umsakazo weSouth African Broadcasting Corporation ubika ukuba ibandla elibusayo eleAfrican National Congress selithume ezinye iziphathamandla zalo ukuba ziyekhuluma loZuma ngokwenzakala eNkandla lapho okugcwele khona abalwa impi yenkululeko bekubutho leUmkhonto Wesizwe, induna zaKwazulu, ibutho laKwazulu labantu abanengi abathi bavikela uZuma.
UNkosazana Lindiwe Sisulu utshele umsakazo weSABC ukuthi uZuma uzakwethula umbiko wakhe oqakathekileyo namuhla eNkandla.
Umsakazo lo njalo ukuthi abantu abadabuka Ethekwini sebethe gwaqa emzini kaZuma loba inkantolo yeConstitutional Court isithi izahlolisisa isicelo sakhe kunsukwana ezilandelayo esokuthi kwesulwe isigwebo lesi kumbe engavalelwa entilongweni ngoba usekhulile njalo uyagula.
UEdward Zuma, umntaka Zuma, utshele iReuters News Agency ukuba uZuma kayindawo.
Ekhuluma labasekeli bakhe izolo eNkandla, uZuma uthe kalacala.
Kodwa uNkosazana Tandi Jikelani, ohlala eJohannesburg, uthi uZuma kumele avalelwe entilongweni. UNkosazana Thuli Cele kavumelani laye.
UMnu. Mgobo Kawugobeki laye ulombono ofanayo.
Kukhangelelwe ukuba inkantolo yeConstitutional Court izahlolisisa udaba luka Zuma mhlaka 12 Ntulikazi. UZuma wetheswa icala lokuthi wala ukuyanika ubufakazi ikhomishini ehlolisisa amacala obukhohlakali awetheswayo.
