amalinks wokungena

Breaking News

Umthethwandaba Uthi uJacob Zuma Kumele Abuyele Entilongweni


FILE: UMnu. acob Zuma ukhuluma lozulu esigodlweni sakhe eNkandla

Umthethwandaba waphezulu oweHigh Court ePretoria, kwele South Africa wethule isinqumo sokuthi owayengumongameli walelo lizwe uMnu. Jacob Zuma abuyiselwe ejele ayeqedisa isigwebo sakhe sokudelela umthethwanda.

Usethula isinqumo sawo eHigh Court ePretoria lamhlanje, umthethwandaba uthe isinqumo esathathwa ngusikomitshi wezamajele umnumnzana Arthur Fraser, esokukhulula umnumnzana Zuma ukuthi ayeqedisa isigwebo sakhe ekhaya kasikho emthethweni.

Umthethwandaba uthe endaweni yalesi sinqumo esathathwayo usufake isinqumo sokwala isicelo sikaZuma sokuthi akhitshwe ejele ngesizatho sokugula.

Umthethwandaba uthe uZuma kufanele abuyele ejele eyeqedisa isigwebo sakhe senyanga ezilitshumi lanhlanu asiphiwa ngemva kokwala ukulandela isinqumo somthethwandaba owawuthe akaye phendula imibuzo kukomishini ehlola ezenkohlakalo.

Umthethwandaba ubuye wathi inyanga eziphose zifike ezintathu umnumnzana Zuma aziqede apika esemziniwakhe akufanelanga zibalwe nxa esebuyele ukuyaqedelela isigwebo sakhe.

Umthethwandaba usole usikomishi wezamajele ngemva kokuxolela uZuma kukanti iqula elibona ngokuxolelwa kwezibotshwa lalithe angakhululwa.

Isinqumo somthethwandaba lesi sesisolwe kakhulu ngabanengi kweleSouth Africa kugoqela labeZimbabwe.

Isizalwane seZimbabwe umnumnzana Greatman Mkhwebu uthi kuyacaca ukuthi ukubotshwa kukaZuma bekuvele kungasetshenziswa umthetho kodwa inzondo nje kuphela.

“Ubotshwe lamhlanje, kusasa uyabuyiselwa, kusasa uyangeniswa kanti lawe ungumuntu uyabe ufuna ukuphumula so, kulokhu okwenzakala ngakhona lami ngiyabona ukuthi ikhona into eyenzakala singatshelwa, ngoba kunzima ukuthi ukholelwe ekuthini ijudiciary system yeSouth Africa yona ibona kanjani ukuthi lento iwrongo loba iright. Hayi mina ngibona angathi kule sandla semfene la.”

Umnumnzana Mlungisi Tshabalala yena uthi kuyadanisa okwenzeka kuMsholozi.

“Angingakutsho mina ngaloludaba lukaMsholozi yikuthi soluludala udaba lolu. UMsholozi usegugile. Abayekele uMsholozi eziphumulele ekhaya.”

Ingcitshi kwezemithetho njalo eligqwetha umnumnzana Vusumuzi Sibanda uthi lobanje lesi sinqumo sisitsho ukuthi umnumnzana Zuma abuyele ejele, kusaselamanyathelo angawathatha ukwenqaba lokho.

“Usengafaka isicelo esokuthi aphikisane lesinqumo senkantolo ephakeme esokuthi ukuxolelwa kwesigwebo sakhe bekungekho emthethweni. Ngaleso sikhathi nxa esefakile isicelo se appeal kutsho ukuthi usengahlala phandle. Nxa bemqabela lokhu usengafaka isicelo sebail ukuthi ma kusenziwa lokhu engaphandle ngoba sonke isibotshwa silalo ilungelo lebail ikakhulukazi umongameli okwazakalayo ukuthi ngeke abaleke”

Kusenjalo inhlanganiso yeJacob Zuma Foundation ithi umnumnzana Zuma usebhalele emthethwandaba ecela ithuba lokuphikisana lalesi sigwebo.

Ngakwelinye icele ugatsha lwezamajele luthi lusakhangelisisa lesi sigwebo andubana luthathe inyathelo ngalokhu okwethulwe kulesi sigwebo, kugoqela ukubuyiselwa kukaZuma ejele.

Facebook Forum

XS
SM
MD
LG