amalinks wokungena

Breaking News

Kubotshwa uSiziba Ngesikhathi Amapholisa Ethwalise Nzima uJob Sikhala weMDC


Igqwetha lika Mnu. Job Sikhala uMnu. Innocent Gonese.

Amapholisa asebophe uOstallos Siziba, unobhala jikelele webandla leMovement for Democratic Change (MDC) elikhokhelwa nguMnu. Nelson Chamisa, ngesikhathi kumele kuthoniswe uMnu. Job Sikhala, owetheswa icala lokuzama ukugenqula uhulumende kaMongameli Emmerson Mnangagwa.

UMnu. Ostallos Siziba
UMnu. Ostallos Siziba

USiziba, okuthiwa wethula umbiko wokutshotshozela ukungezwani eZimbabwe ekhuluma lozulu eGlen View ngempelaviki, ubotshwe eHarare ngoLwesithathu.

Ukhangelelwe ukuthi uzamiswa emthethwandaba ngoLwesine.

Ibandla leMDC lethule umbiko othi uSiziba ubotshwe ngamapholisa ohlangothi lweCriminal Investigation Department (Law and Order Section) eHarare.

Kusenjalo, abasekeli beMDC batshengisele eHarare beveza ukucunuka ngokungalethwanga komsekeli kamgcinisihlalo webandla labo uMnu. Job Sikhala ongummeli we engeza West edale lephalamende, emthethwandaba ngoLwesithathu obotshwe ngoLwesibili esetheswa icala lokufuna ukugenqula uhulumende.

Batshengisela eHarare phandle komthethwandaba
Batshengisela eHarare phandle komthethwandaba

Abohlangothi lwabatsha batshengisele bephuma emthethwandaba beveza ukuthukuthela ngemva kokunanzelela ukuba uSikhala akalethwanga ukuzothonisiswa icala aletheswayo.

Lokhu kungemva kokuba sebezwe ihungahunga lokuba amapholisa asemthethe amusa eMasvingo.

Elinye lamagqwetha ka Sikhala uAdvocate Innocent Gonese uthe kuyamangalisa ukuthi amapholisa ehlulekile ukuletha uSikhala emthethwandaba.

Isikhulumeli sebandla leMDC, uMnu. Daniel Fortune Molokele, uthi kuyadanisa okwenziwe ngamapholisa labatshutshisi.

UMnu. Mfundo Mlilo, isakhamuzi seHarare, uthi kulihlazo okwenziwe ngamapholisa.

UMnu. Nelson Chamisa loMnu. Job Sikhala
UMnu. Nelson Chamisa loMnu. Job Sikhala

USikhala ubikwa ukuthi uthwalelwe eBikita esabelweni seMasvingo lapho atshela khona abantu emhlanganweni ukuthi ibandla leMDC lizasusa uhulumende kaMnangagwa esikhundleni kungakafiki ukhetho oluzakwenziwa ngomnyaka ka2023.

USikhala wetheswa icala lokufuna ukugenqula uhulumende kaMnangagwa.

Uthwalelwe eMasvingo kulandela ukutshengisela kwabantu eHarare akade bemelele ukuthi amiswe emthethwandaba kamantshi.

Uhulumende wethule umbiko othi kungamanga ukuthi uSikhala usethunjwe ngamapholisa ensitha. Uthe okwamanje usethwalelwe eMasvingo lapho akhuluma khona ukuthi kuzasuswa uhulumende kaMnangagwa kungakafiki ukhetho ngomnyaka ka2023.

Udaba Esilethulelwe NguMavis Gama
please wait

No media source currently available

0:00 0:04:54 0:00

Facebook Forum

XS
SM
MD
LG