amalinks wokungena

Breaking News

Bayakhala Abantu Kwele Melika Ngokubhubha Kuka John Lewis


Umuyi uJohn Lewis

Bayakhala abantu kwele Melika ngokubhubha kuka John Lewis, obelwela amalungelo kazulu njalo owayesebenza lomuyi uMartin Luther King Junior labanye besenzela ukuthi abantu abansundu balingane labamhlophe kwele Melika.

ULewis, obelesifo semvukuzane, ngomunye wabalunywa yizinja batshaywa ngamapholisa endaweni yeAlabama ngomnyaka ka1965 abansundu betshengisela besithi bafuna ukuba lelungelo lokuvota lokunye.

Ubelilunga ledale leHouse of Representatives ngesikhathi etshona. Abantu emhlabeni wonke jikelele bathi umuyi liqhawe lamaqhawe.

Ubengowokucina phakathi kwabantu abayisithupha abaziwa ngokulwela amalungelo kazulu abatshengisela eWashington ngomnyaka ka1963 lapho uMartin Luther King Junior ethulela uzulu umbiko owaziwa emhlabeni wonke jikelele owawulesihloko esithi ‘I Have A Dream’.

Ngomnyaka ka1965, uLewis watshengisela labantu abedlula amakhulu ayisithupha – 600 ebholohweni leSelma's Edmund Pettus Bridge lapho atshaywa kabuhlungu ngamapholisa atshiya abantu belimele okumangalisayo.

ULewis walimala ekhanda lemzimbeni ekutshengiseleni lokhu.

Usuku lolu lwaziwa ngokuthi yiBloody Sunday ngenxa yokuthi kwachitheka igazi elinengi baze batshaywe ngamapholisa.

Ngokuya kwesikhathi, uhulumende wakwele Melika wacina evuma ukuthi abantu abansundu bavote.

ULewis wehlisa inyembezi ngosuku ipholisa libulala uGeorge Floyd, owafithizelwa entanyeni waze watshona.

Kodwa wayelokhu elethemba lokuthi ubudlelwano bantu abamhlophe labansundu buzakubangcono ngokuya kwesikhathi.

Facebook Forum

XS
SM
MD
LG