amalinks wokungena

Breaking News

UBiden Wethula Edale leCongress Inhlelo Zokuthuthukisa Ilizwe leMelika


UMongameli Joseph Biden ukhuluma edale leCongress.

UMongameli Joseph Biden uthi uhulumende wakhe usebenzela abantu njengoba seyenelise ukwethula uhlelo lokulwisana lokumemetheka kwegciwane leCOVID-19 njalo lokwethula inhlelo ezithakazelelwa nguzulu lezinye ezilakho ukuthuthukisa umnotho welizwe.

UBiden wethule lokhu ngoLwesine kusihlwa kwele Melika edale leCongress lapho atshele khona abantu bakwele Melika ukuthi usezamile kusikhatshana engene esikhundleni sikamongameli ukuguqula indlela ilizwe elaliphethwe ngayo nguhulumende kowayengumongameli, uMnu. Donald Trump.

UBiden, owethule umbiko lo phambi kwamalunga edale leHouse of Representatives lawe Senate amalutshwana ngenxa yesimo esibi sokumemetheka kwegciwane leCOVID-19, uthe ungene esikhundleni sikamongameli ngesikhathi umemetheka okwethusayo umkhuhlane weCoronavirus.

“Ngime phambi kwenu kusele ilanga elilodwa kuphela ukuba ngifikise insuku ezilikhulu ngisesikhundleni. ICOVID-19 ngumkhuhlane owesabekayo njalo umnotho kade ukusimo esesabekayo. Bekusephulwa iziqondiso zokuphathwa kombuso. Ngifisa ukulitshela ukuthi konke lokhu sokuguquka.

UBiden uthe kulenhlelo ezinjengokunika abantu imali ebizwa ngokuthi yiStumulus eyethulelwa abantu ukuze baphume ebunzimeni ababebhekane labo.

Uthe uhulumende wakhe uzimisele ukulungiselele abantu impilo engcono ngokuba lohlelo lweAmerican Jobs Plan, okumele lupasiswe lidale leHouse of Representatives lele Senate.

“Lolu luhlelo oluzathuthukisa abantu abanengi kwele Melika njalo luguqule lomnotho. Ingcwethi kwezomnoto zithi uhlelo lolu luzakwenza kube lemisebenzi eminengi okumangalisayo kwele Melika. Lolu luhlelo lokuvuselela ilizwe leMelilka labantu abayizisebenzi abayibo abakha ilizwe hatshi iWall Street.”

UPhinde wathi banengi abantu asebehlatshwe amajekiseni okuvuselela amasotsha omzimba alwisana legciwane leCOVID-19.

UBiden uthe ilizwe leMelika selibuyela kunhlelo ezinjenge Paris Climate Agreement eyalahlwa nguhulumende kaTrump. Ukhulume njalo kabanzi ngokwehlela uGeorge Floyd, owabulawa lipholisa eMinneapolis abantu batshengisela emigwaqweni besola izenzo ezimbi zamapholisa. Kodwa omele ibandla lama Republicans, uSenator Tim Scott, owethule imibona yebandla leli ngokukhulunywe nguBiden, usole kakhulu amazwi kaBiden.

Odabuka eZimbabwe ohlala eMelika, uMnu. Raphael Mthombeni, uncome okwethulwe nguBiden.

UPhinde wathi uBiden ukhanya ezimisele ukusebenzela uzulu. Lokhu kusekelwe nguMnu. Busani Mbuso Ntini, laye ohlala eMelika, othe okufiswa nguBiden kulakho ukunceda uzulu.

Bekugcwele abezomvikela edale leCongress ngesikhathi uBiden esethula umbiko wakhe kulandela ukuhlaselwa kwendawo le ngabalandeli baka Trump ngoZibandlela lonyaka befuna ukuvimba ukubalwa kwama Electoral Votes.

please wait

No media source currently available

0:00 0:04:12 0:00

Facebook Forum

XS
SM
MD
LG