UMongameli Joseph Biden ukhangelelwe ukuba kusasa uzakwethula umbiko wesikhumbuzo sokubhidlizwa kwezakhiwo zeMelika ngamalwecatsha eAl-Qaeda ngomnyaka ka2001, okubizwa ngeSilungu ngokuthi yiSeptember 9/11.
Sekuleminyaka engamatshumi amabili kwenzakala isehlakalo lesi okwabhubha abantu abazinkulungwane ezintathu – 3,000.
UBiden ukhangelelwe ukuba uzakwethula umbiko lo eseNew York lapho okwabhidlizwa khona izakhiwo zeWorld Trade Center ngamalwecatsha asebenzisa indizamtshina ezimbili. Amalwecatsha la atshayela eyinye njalo indizamtshina eyabhidliza ingxenye yesigodlo sebutho esePentagon duzane leWashington DC.
Indizamtshina okucatshangelwa ukuba kwakumele iwiselwe eWhite House yawela egangeni ePennylsvania kulandela ukutshaywa kwelwecatsha elaliyitshayela ngababeyigadile.
UMnu. Den Moyo, odabuka eZimbabwe ohlala kwele Melika, uthi okwenziwa ngamalwecatsha kwethusa umhlaba wonke.
UMoyo uthi amalwecatsha la alakho ukwenza okufanayo ngoba ababebusa kulelolizwe uBin Laden elungiselela ukubhomba kwele Melika, sebehluthune intambo zombuso.