Ingcwethi ezicubungula ezombusazwe zithi ibandla elibusayo eleZANU PF lilakho ukunqoba kalula kukhetho lokudinga amalunga edale le phalamende esabelweni seMashonaland Central njengoba lelibandla lahle lanquma ukuthi akula elinye ibandla elingalokotha lingene kulesi sigaba lizokhankasa okusukela, embalini yempi yekululeko lapho okwakusebenzela ibutho layo eleZANLA.
Kodwa ezinye njalo ingcwethi zithi lonyaka kungaba kujikisile iZANU PF ingakhutha ugatsha ilahlelwe phansi eMashonaland Central ngoba kulabanengi abalokhu behlonipha owayengumongameli, uMnu. Robert Mugabe njalo ukudonselana lokufuthelana okukhona phakathi kwayo kulakho ukutholisa abamabandla aphikisayo ithuba lokudobha izihlalo ezithile.
Isigaba se Mashonaland Central selokhe ilizwe lathola uzibuse kasikaze simelwe ngelinye ibandla ngaphandle kwe ZANU PF okwenza abantu bahle besabele khatshana ukungalivoteli.
Ingcitshi ecubungula ezombusazwe, uMnu. Tatenda Mufamba uthe izakhamizi zeMashonaland Central zivele zivotela iZANU PF kungelani lokuthi kulobani ngakhoke abakhangeleli inguquko lonyaka ngoba vele layo iMDC ayikhanyi lokuthi ihlelekile ngoba ibe lokudonselana kukhetho lwayo lwama primary elizweni lonke.
Enye ingcwethi yezombusazwe ehlala eMazowe, uMnu. Wellington Makoni uthe iZANU PF ikhanya isebenza sibili endaweni ezinjengabo Mazowe ukuthi inqobe kukhetho lolu njalo abameli babo edale le phalamende ngabahlonitshwa ngabantu kakhulu.
Enye ingcwethi yezombusazwe uTjenesa Ntungakwa uthe noma iMashonaland Central sokungani yindawo yamadlozi awe ZANU PF ingathathelwa ezinye izihlalo ngenxa yokulwisana okuke kwabakhona ngomnyaka ophelileyo phakathi kwecele leLacoste lele G40.
Kukhetho luka 2000, ibandla leZANU PF lanqoba zonke izihlalo ze Mashonaland Central. Kwathi ngo 2008 iMDC yenelisa ukuthola izihlalo ezimbili phakathi kwezilitshumi lathoba minwembili ezazikhona, kodwakhe ngo 2013 zathathwa zonke yiZANU PF.
Unkosikazi Prudence Ndlela uthe okuzakwenza iZANU PF inqobe yikuthi amabandla aphikisayo lawo ayazehlulekela nanku lokhu edonselana ubukhokheli.
Ezinye ingcwethi zithi ukuncintisa kuka Nkosikazi Joice Mujuru kukhetho kuzaletha inguquko njengoba abanye abantu be Mashonaland Central bembona njengenzalo yalumango kodwa lokhu kungenzakala kuphela angathola ithuba lokukhankasa.
Abanye njalo bathi ukukhitshwa kowayengumongameli uMnu Robert Mugabe kuzakwenza abanye abantu bavotele ibandla le NPF lobanje lingakabonakali lisebenza empakathini.
Ukhetho lwalonyaka lutshiyene lolweminyaka edlule njengoba lungolwakuqala lokhe iZimbabwe yathola uzibuse olungela Mnu. Mugabe encintisa.
Kukantike ngale ngakucele leMDC ngolwakuqala njalo kungela Mnu. Morgan Tsvangirai kuphepha le ballot.
