Ukhetho lwalonyaka lulenkulungwane zabantu abazancintisa, okulinani elingakazi libonakale selokhu ilizwe lathola uzibuse.
Kukhetho olwedluleyo olomnyaka ka 2013 kwakulabantu abalitshumi kuphela abancintisa kukhetho lokudinga umongameli kodwa lo umnyaka kulabangamatshumi amabili lantathu.
Kulabesifazane abane kuphela abathi uNkosikazi Joice Mujuru, uNkosazana Thokozani Khuphe, Nkosazana Melbah Dzapasi lo Nkosikazi Violet Mariyacha. Abesilisa bona balitshumi lasitshiya gololunye.
Ngomnyaka odluleyo kwakulabantu abahlanu kuphela abancintisa kukhetho lokudinga umongameli welizwe.
Ukuhlaziya loludaba uChris Gande we Studio Seven uxoxe lengcwethi kwezombusazwe, uMnu. Cassius Jayz Simana Mpofu.
“Lokhu kuyamangalisa elizweni elincane njengelakithi. Ngezinye indlela kutshengisa ukuthi abathathi ipolitics bayithathela phansi abananzeleli ukuthi yikho okubalala ilizwe,” kutsho Mpofu.
