Ukwehla esihlalweni kobengumsekeli kamongameli welizwe ngo Mvulo, sekutshiye uzulu lengcitshi ezicubungula ezombusazwe, zibheke ngelokhozi, ukuba ngubani ozathatha isikhundla lesi.
Idale laphezulu ele ZANU PF Politburo liyahlangana ngoLwesithathu lapho elikhangelelwe ukuphatha ngodaba lokutshiya umsebenzi kuka Mnu. Kembo Mohadi. Kodwa isinqumo sokuba ngubani ongakhethwa ukuthatha isikhundla asesitshiyile, sisezandleni zikaMongameli Emmerson Mnangagwa, phansi kwezinqondiso zesisekelo sombuso webandla leli.
Abanye njalo ngabathi uMnangagwa ulakho ukuphuza ukutsho ukuba ngubani ozathatha isikhundla sika Mohadi amelele umhlangano omkhulu owe Congress owe ZANU PF ekupheleni kuka 2022 akhethe ozathatha isikhundla lesi.
Isisekelo sombuso ese ZANU PF sithi ibandla leli kumele libe labasekeli ababili abakhethwa kuhambelana lomanyano owe Unity Accord bekhethwa ngu Mongameli webandla.
Nxa isisekelo sebandla leli singaguqulwanga, uMnangagwa kumele akhethe umuntu owayeku PF ZAPU lona elabambana lele ZANU ngo 1987 phansi kwesivumelwano seUnity Accord.
UMnu Steven Sibanda ingcitshi ecubungula ezombusazwe uthi inguquko eyenzakala ku ZANU PF ngo 2017, isiguqule indlela abantu abakhethwa ngayo ezikhundleni.
"Uma sikhangele umsekeli ka Mongameli ubesuka ku ZAPU, okutsho ukuba isikhundla lesi ngesomuntu we ZAPU"
Eyinye njalo ingcwethi ecubungula ezombusazwe uMnu Alfious Mapuranga ulombono owehlukile lokaSibanda.
“Ukubona kwami engimbonayo olakho ukuthatha isikhundla lesi, bengathatha umuntu ovela kubutho ngibona engani balakho ukuba uMnu Phili Valerio SIbanda ethathe isikhundla lesi”
Ngaphandle kukaMoyo loSibanda abanye njalo baphosela amanye amabizo, anjengo Mnu Obert Mpofu lo Mnu Tshinga Dube.
UMnu Henry Chigodo isakhamuzi seHarare ngomunye wababona angani uDube angaba lethuba.
“Ngicabanga ukuthi singafaka uTshinga, oMathema, oKhaya Moyo ngabantu abangasiphambanisa elakusasa. UTshinga ungcono ngoba sewatshontsha kudala, ingqondo yakhe njengomuntu owayekuhulumende ka Mugabe siyamamukela”
Kodwa abanye njalo bathi kulabantu abanengi uMnangagwa angakhetha khona okugoqela uMnu Cain Mathema ngoba wayekuviyo le ZIPRA njalo wasebenza phansi kuka muyi uDr Joshua Nkomo njalo waba ngumphathintambo wendaba zasekhaya okuyisikhundla esake saba lo Mohadi lomuyi uMnu. John Nkomo.
Kodwa abebandla leZAPU elibunjwa yilabo abaphuma, kumanyano weUnity Accord, bekhokhelwa ngumuyi uMnu. Dumiso Dabengwa, bathi kabalani lokwenzakala ku ZANU PF. Okufakazwa yisikhulumeli saleli bandla uMnu Iphithule Maphosa.
“Sokudlule iminyaka engamatshumi lane selokhe ibandla le ZAPU laphuma ku Unity accord okwenzakala ngo 2009. Aasila sabelo sokuba ngubani ozathatha isikhundla ku ZANU. Bonke abantu be ZAPU bakhona ku ZAPU”
UMnu Tafadzwa Mugwadi isikhulumeli se ZANU PF uthi umhlangano wabo wakusasa awulani lesikhundla esitshiywe nguMohadi.
“Ngiyatsho ukuba iqula lebandla ele Politburo liyahlangana kusasa mhlaka 3 ku Mbimbitho. Ngumhlangano wansukuzonke nje”
Abanye ababeku ZAPU abacatshangelwa ukuba bengakhethwa ukuthatha isikhundla lesi, bagoqela uNkosikazi Judith Ncube umphathintambo obona ngeBulawayo, owayengumphathintambo we Mashonaland West uMnu Ambroise Mutinhiri, umphathintambo wezamabhizimusi amancane laphakathi laphakathi, uNkosikazi Sithembiso Nyoni labanye.
UMohadi utshiye isikhundla ngokuyangeka okukhulu ngemva kokuba kuphume imbiko yokuthandana kwakhe labesifazana abanengi abagoqela abendileyo abasebenzela ehofisini yakhe.