amalinks wokungena

Breaking News

Kambe uChamisa loMnangagwa Yibo Abangabangisana Okulendima Kulabanye Abancintisa Kukhetho?


UMnu. Nelson Chamisa

Ngesikhathi imikhankaso yokhetho oluzayo isiphakama ngesiqubu esiphezulu, inengi lithi umkhokheli welinye lamacele awe MDC-T uMnu. Nelson Chamisa kanye lomkhokheli weZanu PF uMongameli Emmerson Mnangagwa yibo abakhokhelayo kulabo abazancintisa esikhundleni sikamongameli welizwe.

Njengobake ikhomishini ebona ngezokhetho isithi kulamabandla edlula ikhulu azancintisa ekhethweni lwalonyaka, lokhu kutsho ukuthi banengi kakhulu abazancintisa esikhundleni sikamongameli lobanje amanye amabandla engakhetha ukungancintisi kulesi sikhundla.

Inengi labantu lithi lesisikhundla sizathathwa ngomunye wababili phakathi komkhokheli welinye lamacele awe MDC-T umnumnzana Nelson Chamisa loweZanu PF umnumnzana Emmerson Mnangagwa.

Kodwake intathelizindaba yeZimbabwe uMxolisi Ncube uthi kungakhangelwa osekwenziwe nguMnangagwa lasekutshilo selokhe engene esihlalweni, kusobala ukuthi lolukhetho nguye ozalunqoba.

“UMnangagwa singathi siyakhangelisisa yikuthi uthe yena into ayifaka phambi kwakho konke yikuthi avuselele isizwe seZimbabwe, ilizwe leZimbabwe, umkhonomi weZimbabwe. Abantu yikho kodwa abakufunayo lokhu ukuthi babekwazi ukuthi isinkwa sabo sakusasa sizavela kuphi. Abalandaba lento lezi ezinenginengi. UMnangagwa uzabonakala engumuntu okhangelela abantu abahluphekileyo,” kutsho uNcube.

Kodwake isiphathamandla sebandla leMDCT umnumnzana Solomon Chikowero uthi kusegcekeni ukuthi umnumnzana Chamisa ulosekelo olwedlula bonke abancintisa kulesi sikhundla.

“In terms of appealing uChamisa uya appealer kubantu abatsha. So abantu abatsha abanengi baregiste ukuvota so they resonate with Chamisa. So thina siyabaser abapoolayo kuma crowds ukuthi ngubani onamacrowds amanengi. Siyabona ukuthi uChamisa uphambili,” kutsho uChikowero.

Abanyeke bathi bobabili uChamisa loMnangagwa bazithole ngokungekho emthethweni izikhundla zabo okungenza bengasekelwa nguzulu nxa sekuyiwa ekhethweni.

Kodwake uMxolisi Ncube uthi sekulezibonelo zokuthi iZanu pf ayisela kuthandabuza ukuthi isilunqobile ukhetho oluzayo.

“Sesibone iMDC icampaigner kuzo zonke indawo eZimbabwe lalezo obekuthiwa ngezeZanu PF ebingavunyelwa khona ekuqaleni. Lokho ngombono wami kutsho khona ukuthi iZanu pf iyazi ukuthi phi induku eyifihle emqubeni. Iyazi ukuthi i MDC ayilayo ichance yokuthi inqobe ngoba sebeyenzile yonke into abebefuna ukuthi bayenze,” kutsho uNcube.

Ngakwelinye icele uChikowore yena uthi akungeke kwenzeke ukuthi iZanu pf inqobe iMDC-T ekhethweni olukhululekileyo.

“Ukuwinner. Fair, fair, free and fair ukuwina, i MDC izowinner but in terms of rigging and other things angiboni amasotsha akhona okwamanje ukuthi bazovumela ukuthi bazosalutha uNelson Chamisa but ukuwinner ngempelangempela uChamisa or iMDC Alliance izowinner i election,” kutsho uChikowero.

Le yinto egcizelelwa ngesinye isizalwane seZimbabwe umnumnzana Lizwe Gwebu.

“Thina uMnangagwa sithi akulanto azayenza ehlukileyo because ubekhona kuqala ngo 1980 esasemutsha asaselamandla. Into angayenza manje eselabo 75 years entsha yini?,” kutsho uGwebu.

Kodwake abanye abasebandleni leZapu kabavumelani lokuthi ababili laba yibo bodwa abahaba phambili ngoba vele bakhokhela amabandla asedabuke phakathi kanti ababaleka kula mabandla bangena ebandleni leZAPU. Kodwa abanye njalo bathi iZapu ingahli thwaliswe nzima libandla elitsha eleMthwakazi Republic Party.

Abanye njalo ngabathi ngaphandle kokubona amaxuku abantu abangena imihlangano yemikhankaso kaChamisa lekaMnangagwa abukho ubufakazi obubambekayo obukhombisa ukuthi bazavotelwa banqobe.

please wait

No media source currently available

0:00 0:03:14 0:00

Facebook Forum

XS
SM
MD
LG