amalinks wokungena

Breaking News

Kambe Ukhona uMongameli Ongasoze Atshaye Inja Efihla Umphini Kudaba LweZimbabwe Njengo Khama?


Umongameli Ian Khama weleBotswana

Njengoba owayengumongameli weBotswana umnunzana Ian Khama owaphumela egcekeni wachothoza indlela iZimbabwe eyabamba ngayo ukhetho ngomnyaka ka 2013, sewatshiya isikhundla, kambe inkokheli entsha kumbe eyinye kuzwekazi langezansi kweAfrica, ilaso yini isibindi sikaKhama esokukhuluma mgceke uma ukhetho lwalonyaka lusolisa.

Amabandla atshiyeneyo ezombusazwe ayasukelana kukhetho lokudinga umongameli, amalunga edale lephalamende kanye lamakhansila eZimbabwe mhla ziku 30 Ntulikazi.

Kodwa kamanye amacele, ikakhulu amabandla aphikisayo, akhala ngokuthi inkundla kayilingani, ibandla elibusayo leZANU PF liyilo eliyintandokazi yenhlanganiso eqhuba ukhetho eye Zimbabwe Electoral Commission (ZEC).

Abanye bakhala ngokuthi uluhlu lwabazavota aluphumelanga egcekeni ukuze amabandla alusebenzise kuhle ekukhankaseni.

Njalo abakhononayo bathi umabonakude kanye lamaphephandaba angaphansi kukahulumende, awabanikezi ithuba ngendlela okutshengiswa kumbe okubhalwa ngayo ngebandla leZANU PF.

Kulembiko njalo yokuthi intsha yeZANU PF kwezinye izabelo idinda abantu abasekela amabandla aphikisayo, njalo sekulamasotsha afakwe emaphandleni, wona abonakala esekela ibandla elibusayo.

Konke lokhu kuyenzakala ngaphansi kwamehlo enhloli ezivela emazweni atshiyeneyo ikakhulu awe European Union (EU) abazobheka ukuthi ukhetho luzaqhutshwa ngendlela eqondileyo.

Akula oseke wavusa umhlonga phakathi kwenhloli lezi, inengi likhangelelwe ukuthi litsho elikubonayo ngemva kokhetho.

Kodwa inengi, ikakhulu eleZimbabwe, lizakhumbula owayengumongameli weBotswana, umnunzana Ian Khama.

UKhama wayengadondi ukukhuluma iqondo yakhe uma ebona angahambelani lakho kusenzakala eZimbabwe…

"Ngokwenzakale eZimbabwe siyenze obe kumele sikwenze njengomakhelwane kanye lelunga leSADC elilungileyo ngokubatshela okusenqondweni yethu ngesikubone kusikhathaza ngokhetho lwabo,” lo kwakungumongameli Khama ekhuluma ngemva kokhetho lweZimbabwe luka 2013, abanengi abathi ibandla leZANU PF lasebenzisa indlela ezilobuqili ukuze linqobe.

Omunye oweZimbabwe eGaborone, umnunzana Andreas Sibanda uthi uKhama wayengumuntu ongadondi ukubiza ifotsholo njenge fotsholo, kodwa kuzakhangelwa ukuthi inkokheli ekhona eBotswana khathesi yona icabanga njani…

"Inkokheli ekhona itshiyene leKhama, yena owangavumeli okungaqondanga. Asingazi ukuthi mhlawumbe inkokheli entsha yeBotswana izakhuluma ngemva kokhetho, kumbe inengi lisakhangele ukuthi umongameli Mnangagwa ngumuntu onjani,” kutsho uMnu. Andreas Sibanda.

Umnunzana Rodwell Moyo, laye uthi ayisekho inkokheli efana loKhama, kumbe owayengumongameli weZambia, umuyi, uLevy Mwanawasa…

"UKhama ube ngazila zili ekuchothozeni okubi eZimbabwe. Umongameli Masisi ukhanya njengo muntu ozothileyo, engafani loKhama kumbe umuyi umongameli Levy Mwanawasa weZambia,” kutsho uMoyo.

Kukanti umnunzana Mthabisi Dube uthi abeZimbabwe bazamkhumbula uKhama ngesikhathi ilizwe libhekane lokhetho olukhangelelwe ukuthi lube lesitsho esikhulu kakhulu ngendlela ilizwe leZimbabwe elizalithatha kusukela ngemva kokhetho kusiyaphambili…

"Ngengoba sibhekane lokhetho sesikhumbula umuntu ojengo Khama owengaphuzi ukuchothoza okungahambi kuhle eZimbabwe. Okwakhathesi angiboni inkokheli engachothoza, kogoqela lenkokheli ekhona eBotswana, okungahambi kuhle eZimbabwe, ikakhulu sikhangele ukhetho," kutsho uDube

Ele Botswana likhangelelwe ukuthumela inhloli ukuyananza ukhetho ngaphansi kwenhlanganiso ye SADC Parliarmentary Forum, kumbe inxuswe njenge lunga leSADC lapho ilizwe elingathumela abake basebenzela uhulumende belezikhundla eziphezulu, kodwa sebatshiya umsebenzi.

Facebook Forum

XS
SM
MD
LG