Izizalwane zeZimbabwe ezihlala eMelika lezinye ezivela kwamanye amazwe zithi sesifikile isikhathi sokuthi kulungiswe okunye okuhluphayo elizweni lelo loba nje konke kungeke kwabanjwa ngemfanelo nguhulumende kaMongameli Emmerson Mnangagwa.
Ibandla eliphikisayo ele Movement for Democratic Change elikhokhelwa nguMnu. Morgan Tsvangirai lithi akulanguquko ezalethwa nguMnangagwa labanye bakhe.
Lokhu kwethulwe kungxoxo mpikiswano ebiqoqwe ngumsakazo weVOA Studio 7 eWashington DC kwele Melika ngoLwesine ehlolisisa okumele kwenziwe eZimbabwe lapho osokulohulumende omutsha okhokhelwa nguMnangagwa.
Abahlonitshwa abakhulume emhlanganweni lo nguNkosikazi Arikana Chihombori Quao obemele inhlanganiso yeAfrican Union, uMnu. Frank Guni webandla leZanu PF, uNkosazana Rutendo Mudzamiri wenhlanganiso yeWomen to Watch Network kanye loMnu. Den Moyo webandla leMDC-T.
UChihombori Quao utshele umhlangano lo ukuthi uMnangagwa kumfanele ukuthi abuse ngoba ulembali enhle emangalisayo yezombusazwe.
Uphinde wathi amabandla aphikisa elibusayo alakho ukumsusa esikhundleni lobanje engani kawaqoqananga ngemfanelo.
UMnu. Moyo, ongumgcinisihlalo webandla leMDC-T kwele Melika, uthe ibandla eliphikisayo selijayele ukwenza umsindo ongelankawulo okwenza ukuthi lingenelisi ukulungisa okuhlupha uzulu.
UGuni, obekhanya esekelwa nguNkosikazi Chihombori Quao, uphinde wathinta udaba lwe Fifth Brigade oluhlupha abantu beMatabeleland leNkabazwe.
Okhulume umhlangano lo usuphelile, uNkosikazi Sibongile Sibanda, uthe udaba lweGukurahundi kumele lulungiswe ngesiphangiphangi nguMnangagwa.
Uphinde wathi okwenzakala eZimbabwe kumkhumbuza isikhathi ilizwe leZimbabwe lithola uzibuse.
UNkosikazi Mudzamiri ukhuthaze uhulumende kaMnangagwa ukuthi ahloniphe abasakhulayo ngoba bebekhangelelwa phansi nguhulumende kaMnu. Robert Mugabe.
Akwaziwa ukuthi uMnangagwa uzalungisa njani okuhlupha uzulu njengoba abantu abanengi besithi uyehluleke lokufaka umuntu oyedwa kudale lakhe leCabinet ayethule sokuhlwile ngoLwesine.