Ikhansili yeJohannesurg ithi uMeya Jolidee Matongo osanda kukhethwa akusiso sizalwane seZimbabwe
Ikhansili yedolobho leJohannesburg, kweleSouth Africa, ithi uMeya osanda kukhethwa, umnumnzana Jolidee Matongo osendo lwakhe oludabuka eZimbabwe, yena uyisizalwane esizelwe lokukhulela eSouth Africa ngakho akasuye muntu wokuza.
Ukukhethwa kukaMeya uMatongo olabokhokho abadabuka eZimbabwe sekudale ukungunguna kwabathile kweleSouth Africa besithi kungani ibandla leANC livume ukuthi idolobho leJohannesburg likhokhelwe ngumuntu wokuza.
Kodwake okhuluma emmele ikhansili ye Johannesburg unkosikazi Nonceba Molwele uthi uMatongo ngowaseMzansi.
“Umeya uMatongo kakusimuntu wokuza kodwa yisizalwane salapha esigcweleyo.”
Le yinto egcizelelwe nguye uMatongo onguye owakuvezayo ngesikhathi egcotshwa ukuthi okhokho bakhe badabuka eZimbabwe.
“UMatongo omdala wangcwatshwa lapha eMzansi.”
UMatongo uleminyaka engamatshumi amane lesithupha (46) kanti ubeseleminyaka elitshumi lasitshiyagalombili (18) elilunga lekomiti ekhokhela inhlelo zeANC eJohannesburg. Engakakhethwa ukuba ngu Meya, nguye obephethe ugatsha lwezemali ekhansilini yeJohannesburg.
UMatongo uthi lobanje usendo lwakhe ludabuka eZimbabwe ukungena kwakhe esikhundleni akutsho ukuthi sekuzavunyelwa abakwamanye amazwe bangene elizweni ngokungekho emthethweni bahlale santando edolobheni leJohannesburg.
Umgcinisihlalo wenhlanganiso emela abeZimbabwe kweleSouth Africa umnumnzana Ngqabutho Mabhena uthi ukukhethwa kukaMeya Matongo uthemba kuzovula ithuba lokukhulumisana ngenhlupho ezibhekane labakwamanye amazwe eJohannesburg.
“Sicabanga ukuthi ukukhethwa kukaMeya omutsha wedolobho leJohannesburg kuzasincedisa ukuthi silungise udaba lwabantu bokuza abaseJohannesburg ikakhulu. Kuzakwenza ukuthi sibuyele sibuzisise ukuthi idesk leli lisebenza njani elama migrants eJohannesburg.”
Umgcinisihlalo wenhlanganiso yenhlokomo yesizwe Trust umnumnzana Canicious Nkala uthi bakhangelele ukuthi umeya Matongo abengcono kakhulu kulalo owake waba khona owayebandlulula abakwamanye amazwe umnumnzana Herman Mashaba.
“Kusinikeza iexpectation yokuthi sicabanga ukuthi ancedise hayi ukubuyisela abantu emazweni abo but uku regularayiza abantu. Silabantwana abanengi asebestateless hear in South Africa that need to be actually assisted especially in Johannesburg so we expect him as the mayor to understand.
Umnumnzana Matongo uthi ubukhokheli bakhe buzasebenza gadalala ukwenza iJohannesburg ibe lidolobho elincomekayo umhlaba wonke kantike izisebenzi ezingamavila leziqhuba inkohlakalo zizakuyahlala ekhaya.
