Ukwalela ubuphepheli uMnu. Tendai Biti, obebaleke elizweni kulandela imbiko ayethula ngemva kokhetho lokwethuselwa ngabantu abacatshangelwa ukuthi babefuna ukumthumba, sokudale imibuzo eminengi kuzizalwane zeZimbabwe.
UBiti uyazakala elobungane lomkokheli webandla eliphikisayo kwele Zambia, uMnu. Hakainde Hachilema, okungabe kwenze umongameli walelo lizwe, uMnu. Edgar Lungu, angenele ukuthi uBiti angaphiwa ithuba lokuba yisiphepheli.
Ukuhlaziya loludaba sixoxe lengcwethi kwezokungena lokuphuma emazweni, uMnu. Bekithemba Mhlanga, kanye loMnu. Edwin Ndlovu, isiphathamandla sebandla lePeople's Democratic Party ekhokhelwa nguMnu. Biti.
UNdlovu uthe indlela uBiti obekumele aphephe ngeye Chirundu ebiseduze nxa usiya kwele Zambia njengoba impilo yakhe ibisengozini.
UNdlovu uthe lokhu kuzaveza ukuthi ele Zambia alihloniphi ilungelo loluntu njengele Zimbabwe.
UMhlanga laye uvumelane loNdlovu wengeza esithi kumele kuqale kuhlosiswe ukuthi kanti vele kungani ebebaleka elizweni.
“Kumele sizibuze ukuthi kanti kungani vele kade sekuhluphile okwenze wabeleka. Asazi ukuthi icala ubelalo ngoba lokhu lisemthethwandaba."