Ukulwisana okuqhubekayo ebandleni leZanu PF kanye lele MDC-T yibufakazi bokuthi kwabanye ezombusazwe yindlela yokuzisuthisa lokuzinothisa nje kuphela.
Lo ngumbono wabanengi beZimbabwe asebexwayisa abavoti ukuthi bananzelele kakhulu nxa bekhetha abantu abazabamela ekhethweni oluzayo.
Sekuleminyaka kulodlakela lwezombusazwe eZimbabwe kodwa ezinye izizalwane zeZimbabwe zithi osekwenzakele kusukela nyakenye kukhombisa ukuthi kwezombusazwe zelizwe kudlalwa ngabantu besetshenziswa yilabo abafuna ukusuthisa izisu zabo.
Ukungqikilana ebandleni leZanu PF kubonakale mgceke nyakenye phakathi kwabebebizwa Lacoste lobekuthiwa yiGeneration 40 (G40). Laphake bekusobala ukuthi yimpi yamandla lezikhundla engaphathelananga lokusuthiswa kwezidingo zomphakathi.
Kutheke ngemva kokususwa kukamNU. Robert Mugabe esihlalweni, labo abebemsekela ngezandla zombili kuviki eyayisanda kwedlula, bezwakala sekuyibo abamemeza kakhulu bethi akahambe, kanti sebencoma kakhulu uMongameli Emmerson Mnangagwa ababesanda ukusekela ukuthi akaxotshwe kuleli bandla.
Le yinto echazwa ngunobhala webandla leUnited Democracy Movement, UMnu. Andrew Nyathi, njengesibonelo sokuthi abantu bazimisele ukwenza loba yini ezokwenza ukuthi izisu zabo zigcwale.
“Ipolitics yethu engiyitshoyo mina eyakhathesi ibolile. Iboliswe yikuthi abantu bafuna ukudla. Akulayinye into abayifunayo bafuna imali kuphela. Ipolitics le ukuze ilunge aluba kuthiwa ingqondo zabantu ziyafakwa ku Omo lamanzi uziwatshe uziwatshe zibe clean. Asikuyekeleni lokhu sikhangele impilo enhle.”
Akuthathanga sikhathike kwasuka obunye ubudlwangudlwangu ebandleni leMDCT sekubangwa isikhundla sikamuyi uMnu. Morgan Tsvangiai esaphila.
Laphoke kwacina sekutshaywana langezibhakela lasemngcwabeni kamuyi omunye lomunye efuna kungene lowo ozamnikeza itshontsho nxa esesesikhundleni.
Lokhuke kubangele ukudabuka phakathi kwamabandlala womabil. Isizalwane seZimbabwe, uMnu. Stanley Ndlovu, odabuka eTsholotsho uthi kuyacaca ukuthi ezombusazwe seziphenduke zaba yindlela yokuzinothisa kwabalutshwana.
“Nxa sibheke ingxabano enkulu phakathi kwebandla leZanu PF lamanye amabandla ezombangazwe, kuyacacanje kithi ukuthi akunani lezempilakahle kumbe lezombusazwe. Baxabananje badinga izikhundla ukuthi kube ngubani okhokheleyo. Bonke badinga izikhundla zokukhokhela. Ngakhoke thina njengezizalwane zaseZimbabwe silokukhathazeka kakhulu.”
Njengobake sekuphithizela abafuna ukukhethwa begijima indawo yonke, besenza yonke inhlobonhlobo yezithembiso zamanga lezeqiniso ngalesi sikhathi kubhekwe ekhethweni, uNkosazana Lulu Brand Harris uthi abantu kabaqaphele amaqilindini eza kubo embethe ezemvu kanti ngaphakathi zimpisi.
“Kusobala ukuthi ama politicians ethu yizihwaba zabantu. Abacabangeli abanye abantu, abacabangeli ilizwe bayazicabangela bona bodwa. Bafuna ukudla bagqibe izisu zabo kuphela. Lokhu okokuthi balwela thina, hayi angikaze ngibone into enjalo mina. Nga kuthiwa balwela thina ngabe sebasibuza ukuthi sifunani labo nga sebathola indlela zokukhulumisana bebodwa bakhulumisane kuhle.”
Kodwa-ke abanye bathi bayathokoza ngoba okusanda kwenzakala ekhethweni lweZanu PF kukhombisa ukuthi abantu ngeke besaqilibezelwa. Kulabanengi okukudala bemela indawo ezithile edale lephalamende, bengazihluphi ngendingeko zikazulu, abanqotshiweyo ekhethweni kusitsho ukuthi ephalamende bazalugxoba kuphela nxa besiyakwethekela njengo wonke wonke.