amalinks wokungena

Breaking News

'UMnangagwa Kathoniswe Icala Lokubulala Abantu Abadutshulwa Ngamasotsha'


Amasotsha atshaya abantu emigwaqweni eHarare.

Omunye obencintisa kukhetho lukamongameli, uMnu. Timothy Chiguvare, ukhuthaze inhlanganiso yeSouthern African Development Community (SADC) lezizwe zomhlaba ukuthi zibambe ngamandla iZimbabwe ukuthi iqhube ukhetho olusanda kuqhutshwa eZimbabwe kakutsha.

Esethula inkulumo yakhe emhlanganweni labezindaba labenhlanganiso zakwele South Africa, uChiguvare uthe okwenzeke eZimbabwe bekulukhetho olulokuqilibezela okwedlulise amalawulo.

Uthe bafuna umhlaba wonke ungenele kwenqatshelwe ukugcotshwa kukaMongameli Emmerson Mnangagwa, oweZanu PF, athonisiswe ngokubulawa kwabantu ababetshengisela besekuqhutshwa kakutsha ukhetho olukhululekileyo olungelakuqilibezela.

“Balamacala amakhulu okubulala okufuze baziphendulele kuwo ngoba babulele abantu abanye babo abebevela emavinkilini, abanye bengasiyo ngxenye yokutshengisela obekukhona. Akungeke kwenzakale ukuthi umongameli olamacala angaka agcotshwe umthethwandaba ungakatsho ukuthi akala cala.”

Isikhulumeli somkhokheli weMDC Alliance, uDokotela Nkululeko Sibanda, laye obekulo umhlangano wabezindaba, uthe ukuhlukuluzwa, ukwethuselwa, lokubotshwa kwenkokheli labasekeli bamabandla omanyano wabo labamanye amabandla aphikisayo sekufike kusibanga esesabekayo.

Lobanje uSibanda esithi abakaboni imizamo yokubopha umkhokheli weMDC Alliance umnumnzana Nelson Chamisa, akulanto ezabenza besabe ukukhuluma lokuqhubeka ngemizamo esemthethweni yokuthi aphiwe intambo zombuso njengoba kunguye owanqobayo kulolukhetho.

“Abakhokheli beMDC kuqala ngo president uNelson Chamisa bazimisele ngodaba lokuthi indaba zokhetho zingabi lobuqili phakathi lokuthi amalungelo abantu angadlaliswa ngendlela ebuhlungu efana lale. Angiboni kusiba lokwethuka okungako. Lama supporters eMDC athi azimisele ukulwisa esiyaphambili ngoba okungapheliyo kuyahlola.”

Le yinto egcizelelwe ngokhethwe njengoSenator eMatabeleland South, uMnu. Bekithemba Mpofu, yena uthe kulobufakazi obungaphikisekiyo abalabo obukhombisa ukuthi kube lokuqilibezela okukhulu.

Inhlanganiso zikazulu kweleSouth Africa ezigoqela iKhulumani Support Group le Human Rights Institute of South Africa, zithi zifuna inhlanganiso ye African Union Commission iqhube inhlolisiso ebanzi ezavumbulula zonke insolo lamaqiniso phezu kwalolukhetho.

UNkosazana Colett Letlojane, owenhlanganiso yeHuman Rights Institute of South Africa, uthe bazakhuthaza amabandla ezombusazwe kwele South Africa ukuthi lawo aphatheke ekulungisweni kwaloludaba.

Amalunga alezi nhlanganiso bathi baza kuyatshengisela emhlanganweni weSADC ozakwenzelwa eNamibia ngeviki ezayo bekhuthaza linhlanganiso ukuthi ibeleqiniso lokuthi intando kazulu iyahlonitshwa ekhethweni lweZimbabwe.

Facebook Forum

XS
SM
MD
LG