Inhlanganiso yabaphila ngokuzisebenza iBulawayo Vendors and Traders Association isikhuthaze uhulumende ukuthi ehlise imali ebhadalwa ngabantu nxa behlolwa iCovid-19 ukuze baphiwe izetifiketi ezifakaza ukuthi kabalawo lumkhuhlane nxa bephuma elizweni.
Ukuhlolwa komuntu oyedwa kubiza iUS$60, okuyimali engeneliswa ngabanengi.
Inhlanganiso le ithi lokhu yikho okudala ukuthi abanye bathenge izetifiketi zamanga ngemali ephansi. Esisodwa sibikwa sibiza amadola akwelemelika angamatshimi amabili kuphela.
Ngempelasonto kubotshwe abantu ababili ngemva kokutholakala belezetifikeli zokuzibazela ezedlula amakhulu amathathu.
Kunakanelwa ukuthi bebezithengisela abafuna ukuchapha imingcele besiya emazweni angomakhelwane afana leleBotswana leleSouth Africa.
Isiphathamandla senhlanganiso le uMnu Aleck Ndlovu utshele iStudio 7 ukuthi lokhu kufaka impilo zabantu abanengi engozini ngoba abalawo lumkhuhlane belakho ukuwuthelela abanye.
Ngakho, uthi uhulumende kumele ehlise inhlawulo yokuhlolwa umkhuhlane weCovid-19 ukuze abantu bahlolwe ngendlela eqondileyo hatshi ukuthenga izetifiketi zokuzibazela.
Unobhala jikelele wenhlanganiso yezisebenzi, iZCTU uMnu Japhet Moyo yena uthi ukuvulwa kwemingcele kuzanceda kakhulu izimuli ezinengi ebesezithwele gadalala ngokuvalwa kwelizwe.