Ingcwethi kwezokuthoba inhliziyo zabakhathazekileyo ezibizwa ngeSilungu ngokuthi ngama counsellors zithi kuqakathekile ukuthi ababulawelwa abazali lezinye izihlobo libutho leGukurahundi benikwe ithuba lokubakhalela.
Zithi kumele konke lokhu kuqaliswe nguMongameli Emmerson Mnangagwa okumele axolise ngokwenziwa nguhulumende webandla leZanu PF eMatabeleland leNkabazwe kusukela ngomnyaka ka1982 kusiyafika umnyaka ka1987.
Eyinye yezingcwethi lezi, uMnu. Kilton Moyo, uthi abantu kabasoze babhodle okusezifubeni zabo nxa uhulumende kaMnangagwa engaxolisanga okwenzakala ezabelweni lezi okwakudingwa amalwecatsha.
Ibutho leGukurahundi labulala abantu abafika inkulungwane ezingamatshumi amabili – 20,000 ezabelweni lezi lapho ababesithi kulabahlamuki ababelwisana lohulumende kaMnu. Robert Mugabe, owasuswa embusweni ngomnyaka ka2017 libutho leZimbabwe lincedisana lozulu kanye ledale lephalamende.
UMongameli Mnangagwa kakhulumi ngokuxolisa abantu okwamanje lobanje esithi abafelwa yizihlobo bazahlawulwa njalo balelungelo lokungcwaba ababulawa yiGukurahundi.