amalinks wokungena

Breaking News

Kubhonjwa Indlu KaMnu Biti


Kulabantu abajikele ibhomba elenziwe ngamafutha ephethulo endlini kanobhala jikelele webandla leMDC-T uMnu Tendai Biti ngoLwesibili.

Lelibandla lithi isehlakalo lesi senzakale ebusuku ngehola lakuqala njalo akukazakali ukuthi ngubani ojike lelibhomba. Indlu kaBiti ike yabhonjwa njalo ngomnyaka ka2012.

Isehlakalo sangoLwesibili siza kulokufuthelana phakathi kweMDC-T phezu kodaba lobukhokheli bebandla abanye besithi umkhokheli walo uMnu Morgan Tsvangirai sokumele atshiye isikhundla ngoba seyehlulekile ukususa iZanu PF embusweni.

Kumaviki amabili edluleyo kuqhamuke udlakela emahofisini eMDC-T lapho okutshaywe umsekeli kamgciningcebo walelibandla uMnu Elton Mangoma, yena ongomunye wabathi uTsvangirai sokumele asuke esikhundleni.

UBiti yena ubika esile ngokubaleka wangena emoteni kaTsvangirai. Abasekeli bakaTsvangirai bethesa uMnu Biti loMangoma icala lokuzama ukususa uTsvangirai esikhundleni.

Isikhulumeli seMDC-T uMnu Douglas Mwonzora uthi indlu kaBiti ingaba ibhonjwe ngamalunga eZanu PF. Amazwi akhe agcizelelwe ngumsekeli wakhe uMnu Joel Gabhuza.

Kodwa isikhulumeli seZanu PF uMnu Rugare Gumbo ukulandule lokhu esithi abantu beMDC-T yibo abatshise indlu kaBiti.

Kunjalo nje, amapholisa ngoLwesibili abophe abasekeli beMDC-T abathi uMnu Enoch Mukudu, uSteven Jahwi, Francis Machimbidzofa loSimson Nerwande.

Abane laba betheswa icala lokutshaya uMangoma lomabhalane wogatsha lwabatsha uMnu Promise Mkhwanazi njalo bazamiswa emthethwandaba ngoLwesithathu.

NgoMvulo amapholisa athethe uMnu Denis Murira loMnu Murisi Zvizvai phezu kwecala elifanayo kodwa babakhulula ntambama.
XS
SM
MD
LG