Ugatsha lwezempilakahle luthi kufe abantu abalitshumi lane, 14, ngeCovid-19 eZimbabwe ngoLwesithathu.
Ababanjwe lumkhuhlane bazinkulungwane ezine ezilamakhulu edlula amathathu, 4,367.
Lokhu ngokwakuqala esikhathini eside ukuthi iCovid-19 ibulale abantu abengi kanje ngosuku.
Abaphethwe yilumkhuhlane sikhuluma nje bakhwele baya kunkulungwane phose ezingamatshumi amahlanu, 46, 378.
Asebebhubhule bona bakhwele baya kunkulungwane ezine ezilamakhulu aphezu kwayisikhombisa, 4,759.
Abahlatshwe ijekiseni yakuqala yokwenqabela lumkhuhlane izolo njalo bazinkulungwane phose ezingamatshumi amabili, 18,253.
Abahlatshwe eyesibili bazinkulungwane phose ezilitshumi lanhlanu, 14,747.
Isiphathamandla senhlanganiso yeZimbabwe Christian Alliance, yona ephatheke kunhlelo zokulwisana le-coronavirus uMnu Useni Sibanda utshele iStudio 7 ukuthi abantu kumele bazivikele ngazo zonke indlela kulumkhuhlane.