Kubhubhe abantu abalitshumi lasikhombisa, 17, ngeCovid-19 eZimbabwe ngoLwesine njalo kwatholakala abedlula amakhulu ayisitshingalombili, 826, belomkhuhlane lo.
Lokhu kukhweze inani lasebefile laya kuzinkulungwane elamakhulu edlula ayisikhombisa, 1,709.
Asebebanjwe lumkhuhlane bona sebephezu kwezinkulungwane ezingamatshumi amane lane, 44,306.
Abahlatshwe ijekiseni yakuqala yokuvikela lumkhuhlane ngoLwesine bazinkulungwane ezedlula itshumi, 10,526.
Abahlatshwe eyesibili bedlula izinkulungwane ezilitshumi lanhlanu, 15,940. Asebehlatshwe eyakuqala bonke sebengu725,582 kuthi asebehlatshwe eyesibili njalo ingeyokucina bona sebengu467,733.
Ukumemetheka komkhuhlane lo sokubangele ukuvalwa kwendawo ezitshiyeneyo ezigoqela amalokitshi akoBulawayo aphansi kwezigaba ezibalisa iNkulumane, eEmakhandeni kanye lasemalokitshi angenyakatho yedolobho agoqela iMpopoma, Mzilikazi, Luveve, Nguboyenja, Makokoba kanye lenkaba yedolobho.
Kulezindawo abantu abasavunyelwa ukuhamba-hamba kungatshaya ihola lesithupha ntambama, 6 O’clock kuze kuyetshaya u6 O’clock wekuseni.
Amabhizimusi asevunyelwa ukuvulwa ekuseni ngo8 O’clock avale ngo3 O’clock emini yantambama.
Amabhasi wona asezavunyelwa ukuthwala ingxenye yabantu kuphela.
Isiphathamandla senhlanganiso yezakhamizi eyeBulawayo Progressive Residents’ Association uMnu Thembelani Dube utshele iStudio 7 ukuthi abaphila ngokuzisebenza sebesidla luklubhu ngoba kungasaphandeki ngenxa yokuvalwa kwendawo ezinengi.
