Kubhubhe abantu abangamatshumi amathathu lane, 34, ngeCovid-19 eZimbabwe izolo kwathi abedlula inkulungwane, 1,365, bafunyanwa belomkhuhlane lo.
Le yinto etshiye inengi likhuza umhlola ngoba ngokwakuqala ukuthi kubhubhe abantu abanengi kangaka ngosuku olulodwa.
Lokhu kukhweze inani labantu asebebulewe ngumkhuhlane lo selokhe wafikayo eZimbabwe laya kumakhulu aphezu kwamane, 413.
Asebefunyenwe belawo bona bakhuphuke baya kunkulungwane phose ezingamatshumi amabili, 17,194.
Phakathi kwababhubhe izolo abalitshumi ngabedolobho leHarare kuthi abayisikhombisa ngabakoBulawayo.
Kulabayisitshiyangalombili abeManicaland, ababili beMashonaland Central, oyedwa weMashonaland East, abathathu beMashonaland West, ababili beMasvingo loyedwa weMidlands.
Ukumemetheka ngamandla kwalumkhuhlane kuza ngesikhathi ilizwe selivaliwe emizameni yokuwenqabela.
Ingcwethi kwezempilakahle zithi ukuhambahamba kwabantu ngekhefu lekhisimusi lokungaziphathi kuhle kwabantu yikho okwenze wahlasela ngamahla lumkhuhlane.
Udokotela Solwayo Ngwenya utshele iStudio 7 ukuthi amanani ayizolo aveza sobala ukuthi ilizwe selisengozini emangalisayo.
Facebook Forum