Ugatsha lwezempilakahle luthi kubhubhe abantu abangamatshumi amane lane, 44, ngeCovid-19 eZimbabwe ngoMvulo.
Kutholakale njalo abedlula amakhulu amathathu, 349, belomkhuhlane lo.
Lokhu kwengeze inani lasebebulewe yi-coronavirus kuleli laya kunkulungwane ezine ezilamakhulu phose amathathu, 4,293.
Asebefunyenwe belomkhuhlane lo sebesedlula inkulungwane ezilikhulu elilamatshumi amabili lantathu, 123,001.
Abahlatshwe ijekiseni yakuqala yokuvikela iCovid-19 izolo bedlula kancane inkulungwane ezingatshumi amathathu, 32,926.
Abahlatshwe eyesibili baphose babe linani elifanayo, 22,886.
Bonke asebehlatshwe ijekiseni yakuqala sebephezu kwezigidi ezimbili, 2,345,343 kuthi asebehlatshwe eyesibili njalo ingeyokucina sebeyisigidi esilengxenye, 1,483,048.
Uhulumende ubikwa elakho ukwazisa ngokuvulwa kwezikolo yiloba nini ngoba amanani ababanjwa umkhuhlane lo esehlile kulezinsuku.
Isiphathamandla senhlanganiso yeCitizens Covid-19 Monitor uMnu Effie Dlela Ncube utshele iStudio 7 ukuthi abantu kumele baqaphele ngoba lumkhuhlane awukapheli.
