amalinks wokungena

Izembatho Zensitha 'Ezindala' uGrace Mugabe Azinike Abaswelayo Zibophisa Intathelizindaba

  • Gibbs Dube

UNkosikazi Grace Mugabe.

Sokubotshwe intathelizindaba yephephandaba leNewsDay, uKenneth Nyangani, owaloba udaba lokuthi uNkosikazi Grace Mugabe wanika abantu abaswelayo izembatho zensitha ezisebenzileyo (used underwear) esabelweni seManicaland.

Igqwetha lakhe uPassmore Nyakureba wenkampani ye Maunga, Maanda and Associates njalo olilunga lenhlanganiso yeZimbabwe Lawyers for Human Rights, uthi uNyangani wetheswa icala lokwephula iziqondiso zomthetho weCriminal Law (Codification and Reform) Act.

UNyakurebwa uthi uNyangani, ubotshwe ngoMvulo, uyaliphika icala leli esithi udaba alulobayo liqiniso elingathandabuzwayo.

UNyangani waloba ngempelaviki ukuthi omunye wabasekela ibandla leZanu PF, uMnu. Esau Mupfumi, wanika abantu abaswelayo impahla le lokunye okutshiyeneyo esithi ivela kuNkosikazi Mugabe.

Wathi uNkosikazi Mugabe unanzelele ukuthi abanye babelezembatho esezivuthukile ngakho ukubone kuyimfanelo ukuthi abanike izembatho lezi lempahla abangayisebenzisa enjenge zembatho zokulala.

UMupfumi uthi abanye abantu abathola izembatho lezi babophise Nyangani besithi abanikanga izembatho zensitha ezindala.

Kubikwa ukuthi bamangalele uNyangani bemele uNkosikazi Mugabe, osanda kulwisana loNkosazana Gabriella Engels wakwele South Africa amthola elabantwana akhe ewoteleni kwele South Africa.

Wacina enikwa lokhu okuthiwa yi-diplomatic immunity ukwenzela ukuthi engabotshwa ngamapholisa kwele South Africa ayesemdinga ngamehlo abomvu.

Icala lika Nyangani likhangelelwe ukuthi lizathethwa ngoLwesithathu.

Facebook Forum

XS
SM
MD
LG