Ezinye izizalwane zeZimbabwe esezihlala kwele Bhilithane sezibumbe inhlanganiso yokunceda ekhaya lapho abadabuka khona eye Diaspora Cholera Crisis Committee kulandela ukuqhamuka komkhuhlane wesihudo seCholera osumemetheka ilizwe lonke ngenjongo yokubuthanisa imali lokucubungula imbangela yalumkhuhlane
Inhlanganiso le ibunjwe ngodokotela, abongi kunye lamalunga enhlanganiso ezizimeleyo kweleBhilithane ukuthi ilwisane lokusabalala komkhuhlane wesihudo oweCholera osukhathazile eZimbabwe.
Umnunzana Freeman Ncube oweMatabeleland Development Committee ngomunye wabasungule inhlanganiso le.
“Thina ke njengeMatabeleland Development Initiative sibone kufanele ukuthi sihlangane lezinye inhlanganiso labodoketela labo nurse labanye inhlanganiso nje ngesiphangiphangi masinya masinya sibili ukuthi sihlangane safoma iDiaspora Cholera Crisis Committee,” kutsho uNcube.
Uyephambili uNcube echaza ngomsebenzi wali komidi: “Inhanganiso leyo sizama ukuthi sibone ukuthi siya yenza amaresearch, kulabodoketela phakathi ukuthi babone ukuthi yikuyini abangakuncedisa abangancedisa ukuthi sibone ukuthi siyavikela lo mkhuhlane ukuthi ungayiphambili. Singakulungisa lokho kuzayenza ukuthi sibone ukuthi izinto ezinengi eziyizo akade zidala lumkhuhlane ziyaphela.”
Umkhuhlane lo uyavikeleka njalo awukho emazweni asathuthukayo, kutsho uNcube othi umangaliswa yikuthi kwenzakala njani kweleZimbabwe ukuthi abantu babulawe ngumkhuhlane onje.
“Lokhu sisehluleka ukuthi sivikela umkhuhlane okwanisa ukuthi siwuvikele. Bengicela ukuthi abangani bami bonke abakudiaspora labangaphandle asizameni ukuthi sincediseni umkhuhlane lo ungakaphumeli ngaphandle ungakafohli ukuthi ugcwale yonke indawo,” kutsho uNcube.
Uqhubeke uNcube ekhuthaza uhulumende ukuthi alungise impompi zamanzi.
“Ama local authorities lohulumende into yakuqala bazame ukuthi balungise lawo mapipe adubukileyo ayiwo akhipha amanzi angcolileyo angena kwamanye amanzi lemgodini, ama borehole waters asengcolile ngenxa yamanzi la angcolileyo avela emapaipini. Siyazama lathi nje njenge Diaspora Cholera Crisis Committe ukuthi sihlanganise izimali, sithumele izimali ukuthi ziyencedisa khonangale,” kutsho uNcube.
Izibonakaliso zalumkhuhlane yikuzwa isisu esibuhlungu njalo sikugijimisa uhuda ubuye uhlanze, uzizwe uphela amandla ubuye uzwe uwoma.
Ingcwethu zezempilakahle zithi umkhuhlane wesihudo seCholera wenqabelwa yikuhlanzeka, udle ukudla okutshisayo njalo ubilise amanzi kuqala ungakawanathi.
Silokhu sikudaba lunye, kulabantu abachothoza uhulumende ngokwehluleka ukuvimba ukumemetheka komkhuhlane wesihudo owe cholera osubulele abantu abangamatshumi amathathu lanhlanu.
Akesizwe abanye babo bexoxa loGibbs Dube weStudio 7 kuhlelo lwethu Zimbabwe Today esilethulela lona enkundleni yokuxhumana ebulenjini, kuFacebook kupheji lethu ele VOA Ndebele.