UMahluli omkhulu e Zimbabwe uJustice Luke Malaba, lamhlanje ufungise abahluleli abathobamunwemunye ukuqala umsebenzi, emthethwandaba waphezulu oweHigh Court, abasanda kukhethwa nguMongameli Emmerson Mnangagwa, ngemva kokuvivinywa yikomishini ebona ngemithetho eyeJudicial Service Commission.
Abafungiswe ukuqala ukusebenza emthethwandaba oweHigh Court, ngababalisa oMnu. Rogers Manyangadze, Joseph Chilembe, Bongani Ndlovu, Samuel Deme, Munamato Mutevedzi, Never Katiyo, Elijah Makomo, lamakhosikazi amabili uCatherine Cate Bachi Muzawazi loLucie-Anne Chipo Mungwari.
Abekomishini elawula abahluleli bemithethwandaba eyeJudicial Service Commission, bathi ukuqala umsebenzi kwabahluleli abatsha laba kuzanceda kakhulu ukwehlisa umthwalo womsebenzi wemithethwandaba obungasahambi kahle ikakhulu ngesikhathi sokuvalelwa kwabantu ezindlini phansi kwezinqondiso ezeLockdown, zokumelana lobhubhane olweCovid 19.
Phakathi kwabahluleli abatsha laba, ababili babo kuphela ngabesifazana. Bathe bebuzwa abeJudicial Service Commission, ukuthi kungani abesifazana bebulatshwana kangaka, bona bathi lokhu beqhubeka ngohlelo lwabo lokudinga abahluleli abanengi ngakhoke kuhlandla elilandelayo mhlaumbe inani labesifazane lizabe iphezulu ukwedlula leli hlandla.
Abafungiswe ukuqala umsebenzi Ngolwesithathu bahle bakhuphula inani labahluleli bomthethwandaba weHigh Court, laya kwabangamatshumi amane lantathu, abalitshumi lasikhombisa babo kungabesifazana.
Edaleni laphezulu eleSupreme Court kulabahluleli abalitshumi lambili, abahlanu kuphela kungabesifazana.
Omunye wabahluleli abafungiswe namhlanje nguJustice Samuel Deme, owesilisa okhubazeke emehlweni. UChikwanha wamukele ngenjabulo ukuphumelela kwakhe ekuvivinyweni ngabeJSC esithi lokhu kwenziwe kulandelwa isisekelo sombuso welizwe esinika ithuba lelungelo kwabakhubazekileyo ukuthi bengatshiywa phandle endabeni ezinje. U Justice Deme uqhubeke ethi ukuphumelela kwakhe ukukhethwa ukuba ngomunye wabahluleli bomthethwandaba wapheuu kuzsnika idlabuzane kwabanye abakhubazekileyo ukuba basebenze nzima ukuthola amathuba anje hatshi ukumelela ukukhangezwa.
Abenhlanganiso elawula umsebenzi wamagqwetha eyeLaw Society of Zimbabwe, bathi ukwengezwa kwenani labahluleli kulinyathelo elihle kakhulu, kodwa okuqakathekileyo yikuthi amajaji lawa asebenzise ubungcwethi babo ukwahlulela amacala kungabi lokungenela kwezombusazwe emsebenzini wabo kumbe ukukhangwa ngemali ngabosomabhizimusi loba ukudinga ukufumbathiswa.