amalinks wokungena

Breaking News

ICOVID-19 Iguqula Indlela Okuqhutshwa Ngayo Umbukiso weZITF


Ukuqhamuka kobhubhane lweCOVID-19 sokuguqule izinto ezinengi ebeseziyinjwayelo emhlabeni wonke jikelele.

Okunye okuguquke lonyaka yikungavunyelwa kwabantwana ukuzozilibazisa embukisweni weZimbabwe International Trade Fair walonyaka, okhangelelwe ukuqala ngeviki ezayo ngoLwesibili usiyaphela ngoLwesihlanu.

UMgcinisihlalo wabaqondisi benkampani yeZITF, uMnu. Busisa Moyo, uthi besaba ukuba abantwana bengathapha igciwane leCOVID-19.

“Sekusele iviki ukuba umbukiso walonyaka uqale njalo amalungiselelo asefike esibangeni esiphezulu, indikimba yalonyaka iphathelane lokubukisa indlela ezintsha zokusebenza kwamabhizimisi lamathuba akhona, amankampani asebhalisele ukuzobukisa asesedlula amakhulu amathathu lamatshumi amahlanu, njalo kulamankampani asuka kwamanye amazwe alitshumi azabukisa. Abantwana abavunyelwa ukuza kulo umbukiso lonyaka.”

Uqhubekele phambili ethi wonke umntu oza kumbukiso walonyaka ukhuthazwa ukunanzelela lokulandela iziqondiso eziphathelane lokuzivikela kuCOVID-19 laloba umuntu ehlatshiwe ijekiseni yevaccine.

“Siyakhuthazwa ukulandela imilayo yokuvikela iCOVID-19 loba uhlatshiwe ijekiseni yokuvikela iCOVID-19.”

Olwela amalungelo oluntu, uNkosikazi Patricia Tshabalala, usekela ukwaliswa kwabantwana ukuya embukisweni lo.

“Iqiniso lihle abantwana basalele kakhulu ezifundweni zabo okudanisayo, izikolo kumele zibelemfanelo imithi yonke yokuvikela abafundi labablisi. Izikolo uma zithatha imali kumele beqakathekise ukuthenga imithi evikela lumkhuhlane ngoba usubulele abantu abanengi ngakho kumele abafundi bavikeleke kuhlanganisa lababalisi ngoba ngabantwabethu.”

Amalungiselelo ombukiso walonyaka asefike esibangeni esiphezulu njalo ugijima ngesihloko esithi “The new normal for business and industry. Realities and Opportunities’.

Amankampani abikwa asebhalise ukuzobukisa lonyaka, asengamakhulu amathathu lamatshumi amahlanu-350, kuthi alitshumi awo ngasuka kwamanye amazwe abalisa iBostwana, DRC, Indonesia, Kenya, Malawi, Mauritius, Namibia, Nigeria, South Africa le Tanzania.

Umhlaka 21 kusiya ku 23 Mpandula ngamalanga abekelwe osomabhizimusi kuthi umhlaka 24 Mpandula lilanga elivulelwe wonke uzulu.

UMongameli Emmerson Mnangagwa Ukhangelelwe ukuvula lumbukiso okusemthethweni mhlaka 23 Mpandula.

lnani labantu ababanjwe beleCOVID-19 eZimbabwe ngoLwesithathu belilikhulu lamatshumi edlula phose ayisikhombisa-266 kwabhubha umuntu oyedwa.

Emizameni yokumelana lokumemetheka kwaleligcikwane uhulumende senelise ukuhlaba abantu abaphose bafike izigidi ezimbili-1,963,058 ngokugcweleyo kuthi abangakaqedisisi ukuhlaba sebephose bafike kuzigidi ezintathu-2,892,137

Facebook Forum

XS
SM
MD
LG