Abakhangelane lokuhlela amacala eLas Vegas eMelika bathi sokumele owayengumdlali webhola eMelika njalo engumlingisi omangalisayo, uO. J. Simpson, akhululwe entilongweni lapho asehlale khona okweminyaka eyisitshiyagalolunye.
USimpson wavalelwa aze atholakalwe elecala lokusebenzisa umbhobho okungekho emthethweni njalo lokuthumba abantu ababelempahla yakhe ayefuna ukuyithatha.
USimpson, owake wetheswa icala lokubulala umkakhe uNicole Brown Simpson lomgane wakhe uRon Goldman ngomnyaka ka1994, utholakale ukuthi uziphethe kahle entilongweni njalo uyahlonipha abamkhangeleyo.
Omunye umthethwandaba wamthola elokhophe lokuthi wenza ukuthi ababili laba babhubhe kwathiwa kahlawule imuli zabafi laba izigidi ezedlula amatshumu amathathu amadola - $33.5 million.
Icala elamngenisa entilongweni kwaba lesinqumo sokutjhi kumele ehlale entilongweni okweminyaka emithathu lantathu (33 years) kwathathwa isinqumo sokuthi kusigwebo lesi angahlala okweminyaka eyisitshiyagalolunye kusiya phezulu entilonweni.
USimpson, oseleminyaka engamatshumi ayisikhombisa yokuzalwa, ubonge kakhulu ukuthi usekhululwe.
Uzakhutshwa entilongweni ngoMfumfu lonyaka. USimpson waziwa njalo ngokuxotshanisana lamapholisa emgwaqweni engakabotshwa okwakuvezwa ngumabona kude.