amalinks wokungena

Breaking News

Kulenani Eliphezulu LabeZimbabwe KweleBotswana Elikhulelwa yiCovid-19


FILE - Customers wear masks to protect against the coronavirus while queuing at a supermarket in Gaborone, Botswana, March 31, 2020, during the early weeks of the country's COVID-19 restrictions.

Abamakampani akumsebenzi wokuphathisa indleko ngezikhathi zokubhujelwa ngowemuli, amaFuneral Insurance, bakweleBotswana bathi sebebona ukuqansa kwenani labeZimbabwe asebekhulelwa ngumkhuhlane weCOVID-19. Ngalezi nsuku lelo lizwe libikwa libhekane lesimo esibi sabantu ababhubha ngenxa yeCovid-19, abeZimbabwe labo bephakathi kwalelinani.

Inani labalahlakelwa ngumphefumulo ngenxa yeCovid-19, libikwa liqonga okumangalisayo kweleBotswana, kubangelwa kakhulu luhlobo lweDelta variant.

AbeZimbabwe abakulelozwe labo bakhala ezimathonsi, belahlekelwa yizihlobo labangane mihla ngemihla.

Osebenza kunkampani ebona ngokuphathisa abantu ngesikhathi sezimfa, iFuneral Insurance, unkosikazi Soneni Dube uthi sezinengi imuli ezibuya zidinga uncedo ukungcwaba izihlobo.

“Njengomuntu osebenza ku insurance, zinengi izizalwane zeZimbabwe esesenelise ukubabuyisela ekhaya. Kubuhlungu kodwa akulandlela esingakuvika ngaso.”

Kulemuli ezinengi ezicina zicela izandla sezilahlekelwe yizihlobo ngoba zingelamali yokuhambisa isidumbu ekhaya. UDube uthi kuqakathekile ukuthi abantu bangene ngaphansi kwenhlelo eziphathisayo ngesikhathi semfa- ama funeral policy- ukwenqabela ubunzima obehlela imuli ngesikhathi semfa.

“Kubalula kakhulu uma umuntu ezilungiselele ele funeral cover, njengoba siphila ezikhathini ezinzima, imsebenzi ingatholakali. Kunzima ukudinga imali ebantwini ngoba abantu abalamali ezikhathini lezi, kungcono ukuba le policy.”

Umnunzana Benjamin Sibanda uthi ubuhlungu be Covid-19 uma uhlala kwelinye ilizwe buphindwe kabili ngoba kulendleko ezinengi zokuhambisa umuyi ekhaya…

“Okwenzakalayo yikuthi imali esizitholayo zinciphile, abanye baphila ngemisetshenzanyana, ama piece jobs. Abanye abesebenzini uthola ukuthi umholo usuncipha. Ungalahlekelwa yisihlobo kubaluhlupho ukuthi uyenelise ukungcwaba kuhle.”

Uqhubeke esithi inengi lifuna ukuyangcwaba izihlobo ekhaya noma nje imali iludubo.

“Abanengi bethu sifisa ukuthi siyefihla izihlobo zethu ekhaya, lapho okulenkaba yabo khona. Kodwa kulendleko ezinengi, ezigoqela ukuhambisa isidumbu. Udinga imali, ngapho wena uvele usesililweni.”

Abanye abayehluleka ukuhambisa isidumbu ekhaya ngenxa yendleko eziphezulu, bacina bengcwabe kweleBotswana.

Umongameli Mokgweetsi Masisi, esethula umbiko kazulu ngoLwesihlanu olwedluleyo, ukhale ngokuthi isifo seCovid-19 sesivuke ubhova.

UMasisi uqinise njalo izinqondiso zokuvikela ukumemetheka kwalomkhuhlane, ebika ukuthi izikolo zizaqhubeka zivaliwe okwamaviki amathathu alandelayo, kukanti amahola awe curfew, ayengeziwe, kusukela ngehola lesitshiyagalombili (8pm) kusiya kwelesine ekuseni (4am).

KweleBotswana iCovid-19, isithethe impefumulo yabantu abazinkulungwane eziphezu kwezimbili (2,043), kukanti abazingulungwane ezedlula ikhulu(142,380) sebatholakala belomkhuhlane lo lokhu waqhamukayo elizweni lelo nyakenye.

Facebook Forum

XS
SM
MD
LG