Inhlanganiso ye1893 Mthwakazi Human Rights Restoration Movement izakwenza umhlangano omkhulu kwele South Africa kusasa ozahlolisisa umbhuqazwe weGukurahundi.
UMnu. Thembani Dube, umqondisi wenhlanganiso le uthi umhlangano lo uzabe ulabantu abatshiyeneyo abagoqela uMnu. Moses Mzila Ndlovu owake wabangumphathintambo wezokukhumisana umlotha kuhulumende womanyano.
UDube utshele iStudio 7 ukuthi benza imihlangano enje ukwenzela ukuthi kukhulunywe ngokubulawa kwabantu abafika inkulungwane ezingamatshumi amabili libutho leFifth Brigade kusukela ngomnyaka ka1983 kusiyafika umnyaka ka1987.
Owayengumongameli uMnu. Robert Mugabe wathi kwakuyikuhlanya okwenzakala ngesikhathi sombhuqazwe weGukurahundi lapho ayezama ukubhidliza ibandla lePF Zapu elalikhokhelwa ngumuyi uJoshua Mqabuko Nkomo.
Ibutho leli labulala abantu mahlayana lajikela abanye babo emigodini eBhalagwe eKezi esabelweni seMatabeleland South.
UMugabe watshele intathelizindaba ukuthi ibutho leli kwakumele libinge abahlamuka athi babedlelana lebandla leZapu.
Kulemibiko ethi uMugabe wayezama ukubhidliza ibandla likaNkomo ukwenzela ukuthi abuse santando.