amalinks wokungena

Breaking News

Inhlanganiso Ezizimeleyo Zinanza i-International Human Rights Day


Human Rights Lawyers
Inhlanganiso ezilwela ilungelo loluntu eZimbabwe seziveze ukuba uhulumende wakuleli lokhe esalele muva kundaba zokuhlonitshwa kwamalungelo oluntu yikho bemkhuthaza ukuba aphange ahlanganise imithetho ihambelana lesisekelo esitsha sombuso. Lokhu kuphume ekunanzweni kwelanga le International Human Rights day namhlanje eharare.

Le ngeminye yemibono ephume ngesikhathi uzulu weHarare efola emkhankasweni wokunanza usuku lokuhlonitshwa kwamulungelo kazulu oqoqwe yinhlanganiso ye Zimbabwe Lawyers For Human Rights bemanyene labe Zimbabwe Human Rights.

Igqwetha elilodumo kundaba zokulwela ilungelo likazulu enhlanganisweni ye Zimbabwe Lawyers For Human Rights umnumzana Alec Muchadehama utshele intathelizindaba ukuba lokhe engahlonitshwa amalungelo kazulu lanxa kube lemizamo yokukulungisisa lokho kusisekelo esitsha sombuso.

Umgcinisihlalo wesigaba seHarare enhlanganisweni ye ZimRights umnumzana Takawira Mashingaidze uthi lokhe behlukuluzwa nguhulumende, labo abalwela ilungelo loluntu.

Bezikhona njalo ezinye inhlanganiso ezimanyane kulomkhosi wokunanza usuku lokuqakathekisa amalungelo oluntu. Umkhokheli wenhlanganiso elwela amalungelo abaphatheke kwezokuhlabela eye Artists for Democracy in Zimbabwe Trust umnumzana Mehluli Dube uthi lokhe usamele awalondoloze ngokugcweleyo amalungelo oluntu.

Abe Centre For Disability Development labo baphatheke kulokhu kufola okwenziwe ngesikhathi sokudla kwemini lapho umkhokheli walinhlanganiso,umnumzana Masimba Kuchera,atshele intathelizindaba laye ukuba sekunganeno kundaba zokulondolozwa kwelungelo loluntu eZimbabwe.

Kodwa umnumzana Simbarashe Makwati umsekeli womgcinisihlalo weZimRights emzini weGlenview yena uthi kunengi okusadinga ukuba uhulumende akulungisise.

Umnumzana Admire Zaya ngosakhulayo oyisakhamuzi se Chitungwiza obekulomkhosi. UZaya unikeza umbono wakhe phezu kokuqakatheka kwalolusuku lokunanza indaba zokulondolozwa kwelungelo loluntu esola imithetho okubalisa owe AIPPA lowe POSA athi mayiguqulwe ngoba ilokhe ingcindezela uzulu.

Lolusuku lokunanza ukuhlonitshwa kwamalungelo kazulu olwe International Human Rights Day lunanzwa mhla ka 10 ngoMpalakazi minyaka yonke kusukela mhla lubekwa okusemthethweni ngomnyaka ka 1950.

Abehofisi ye UN High Commissiner For Human Rights baveze ukuba lunanzwa ngaphansi kwesihloko esithi “ 20 Years Working For Rights ” kukhangelwa imisebenzi yalihofisi ebona ngezokulondolozwa kwelungelo loluntu selokhu lwasungulwayo lolu hlangothi enhlanganisweni ye United Nations ngomnyaka ka 1993.
XS
SM
MD
LG