Emhlabeni jikelele kunanzwe ilanga lokukhuthuza abantu ukuthi beqakathekise indimi zabo, iInternational Mother Language Day, ngoLwesithathu.
EZimbabwe indimi ezikhulunywayo njalo ezinanzwa yisisekelo sombuso welizwe esiqale ukusebenza ngomnyaka ka2013 zilitshumi lasithupha.
Indimi lezi zibalisa isiNdebele, isiKalanga, isiShona, isiChewa, isiKhoisan, isiTonga, isiTswana, isiNambya, isiBarwe, isikhiwa, isiShangana, isiNdau, isiSotho, isiVenda, isiXhosa kanye leSign Language.
Lanxa nje indimi lezi zinanzwa yisisekelo sombuso njalo ezinye zazo sezifundiswa ezikolo, azikaqakathekiswa ngokulinganayo kanti njalo lasezikolo khona akukabi lengwalo ezaneleyo zokuthi zifundiswe ngokugcweleyo.
Isisekelo sombuso ngokwaso asikahumutshwa safakwa kuzo zonke indimi.
Omunye wabakhankasela ukulondolozwa kwendimi njalo osebenza labathwa uMnu Zenzele Ndebele uthi uhulumende kumele adinge imali yokuthuthukisa zonke indimi eZimbabwe.
