amalinks wokungena

Breaking News

Abadabuka eZimbabwe Abahlala eBotswana Kuzakuba Nzima Ukuthi Bahambe Ekhaya Ngekhefu leKhisimusi


Botswana Border

Inengi labeZimbabwe kweleBotswana lilakho ukwehluleka ukuyafika ekhaya ngekhefu leKhisimisu. Lokhu kuza ngesikhathi iBotswana isithi abantu abafuna ukuhamba ngitsho laphakathi kwelizwe, kumele behlolwe ukuthi abalamkhuhlane weCOVID-19 na.

Uhulumende weBotswana ukhuthaze abazempilakahle ukuthi balungiselele ukuhlola inani eliphezulu labantu abazabe behamba hamba ngekhefu leKhisimusi.

Kuncwadi elotshwe nguhulumende isiya endaweni zempilakahle ezitshiyeneyo, eleBotswana lithi abantu abazahlolwa kumele bahlawule amaPula alikhulu lamatshumi amabili (P120).

Njalo abehofisi ebona ngokulwisana legciwane lecorona, eyeCOVID-19 Presidential Task Force, bathi balakho ukunciphisa inani labantu abaphiwa incwadi zokuhamba hamba ngesikhathi sekhefu lekhisimusi.

Ilunga leCOVID-19 Presidential Task Force, udokotela Mogomotsi Matshaba uthi kufanele ukuthathwa amanyathela ngoba inani labantu abalegciwane lecorona, lisiya liqonga.

“Kutshengisa ukuthi inani labantu abatholakala belomkhuhlane lo malanga wonke, liya liqonga. Lokhu kuyakhathaza, ikakhulu kubuya ngesikhathi sikhangele ikhefu.”

Imigoqo ekhangelelwe ikuthi ifakwe ensukwini ezilandelayo, ilakho ukuthundubeza injabulo abanye abeZimbabwe abakade belayo yokuthi imngcele isivuliwe, ngakho bazathola ithuba lokuyabona izihlobo labangane.

Umnunzana Benjamin Sibanda oweZimbabwe ohlala eGaborone uthi imizamo yeCOVID-19 Task Force izakutsho ukuthi abanengi bantshintshe inhlelo zabo zokuhamba.

“Kuzabulala inhlelo zokuhamba, ngoba abantu abanengi vele beselungiselele ukuthi sifuna ukuhamba. Uhulumende ukuvula kwakhe imngcele kuyabe sekuyize. Uma besithi bavulile imngcele akumelanga kube lemigoqo, uma sebevala, kutsho ukuthi imngcele abayivulelanga abantu.”

Okunye njalo okuhlupha abanye abafuna ukuyafika ekhaya, yikuthi uma ufuna ukuhlolwa, kumele uhlawule, okulakho ukuvalela ngaphandle labo abalezandla ezimfitshane.

Umnunzana Mthabisi Dube uthi ngaphezu kwalokhu, kulendaba eyokuthi inani labantu abatholakala belomkhuhlane weCOVID-19, liyaliqonga emazweni asemhlubulweni wangezansi kweAfrica, kugoqela, iBotswana, South Africa kanye leZimbabwe.

“Ukuqonga kwenani labantu abatholakala beleCOVID-19 khona ngokwakho kuyethusa. Abanye kade bevele bedonda ukuhamba ngenxa yokwesaba ukuthi bazathelelwa umkhuhlane weCOVID-19. Imigoqo kwezokuhamba izakwenza kube nzima ngamandla.”

NgoMvulo, umongameli Cyril Ramaphosa wakwele South Africa, wabika ukungena kwemigoqo ethile kuyindlela yokwenqabela ukumemetheka komkhuhlane weCOVID-19.

EleBotswana lona liqinise umkhankaso wokukhuthaza abantu ukuthi bahlale endaweni zabo, bengahamba hambi ngekhefu lekhisimusi, noma lokhu kusitsho ukungayibona, ikakhulu abadala emakhaya.

Inani labantu abatholakale belegciwane leCOVID-19 kweleBotswana selilanda inkulungwane ezilitshumi lamunwe mbili (11,531), kuthi abangamatshumi amathathu lane (34) balahlekelwa ngumphefumulo.

Udaba lwabeZimbabwe asebehlala eBotswana siluphiwa nguMqondisi Dube
please wait

No media source currently available

0:00 0:03:00 0:00

Facebook Forum

XS
SM
MD
LG