Intathelizindaba yomsakazo weZimbabwe Broadcasting Corporation, uJanet Munyaka, obulewe ngumkhuhlane weCOVID-19 ngoMgqibelo, ungcwatshwe ngoMvulo emathuneni eGlenforest eHarare.
Lokhu kuza ngesikhathi lithuthuka inani labatholakala belalomkhuhlane njalo bengazange bethekelela kwamanye amazwe.
UMunyaka yintathelizindaba yesibili ekhulekwe ngumkhuhlane weCOVID-19 ngemva kokubhubha kwenye njalo intathelizindaba, uZororo Makamba, ngoMbimbitho lonyaka.
Umphathintambo wezokwethulwa kwemibiko, uNkosikazi Monica Mutsvangwa, obesemngcwabeni kaMunyaka, uchaze umuyi njengomuntu owayezinikela emsebenzi wakhe.
“Ngilokudana okukhulu. UJanet ubesemsebenzini emavikini ambalwa nje ngaphambilini kokugula kwakhe, anduba asiwe esibhedlela. Wayewuthanda umsebenzi wakhe. Bangaki phakathi kwethu abayithandayo imisebenzi yabo? Bangaki abazinikeleyo kulokho abakwenzayo kakhulu nxa ungumuntu esebenzela umsakazo wabantu, ukufundisa uzulu lokumthokozisa?”
Abamele inhlanganiso ezilwela amalungelo entathelizindaba, ezigoqela eyezisacathulayo yeYoung Journalists Association Zimbabwe, bathe kuyadanisa ukubhubha kuka Munyaka.
Isikhulumeli seYOJA, uLeopold Munhende, uncome uMunyaka esithi yena labanye bakhe abasacathulayo, bafunde okunengi kundlela akade eqhuba ngayo umsebenzi.
UMunhende uthi bakhathazekile njengenhlanganiso ngokusilela kwendlela zokuvikelwa kwentathelizindaba emsebenzini.
“Sibona iCOVID-19 le isibulala intathelizindaba eyesibili. Okutsho ukuthi thina njengentathelizindaba kufuze lathi sinakekelwe. Kumele besinike ama face masks, leyinye iPersonal Protective Equipment ezakwenza ukuthi sisebenze singekho engozini.”
Sebefika phose inkulungwane ezilitshumi lanye – 10,718 asebetholakale bele COVID-19 selokhu umkhuhlane lo waqhamukayo eZimbabwe ngoMbimbitho, kwabhubha abafika phose amakhulu amathathu - 291.
Izigaba zeMaNdebeleni yizo ezikhokhelayo kunani labatholakala beleCOVID-19 zilandelwa lidolobho leHarare.