amalinks wokungena

Breaking News

UChief Mathema Uthi Kunuka Santungwana Kusigwebo Esaphiwa Induna uNdiweni.


Chief Ndiweni

Induna yezansi yeMaNdebeleni, uKhulumani Mathema, usechothoze inyathelo likamantshi elokugweba induna uFelix Nhlanhlayamangwe Ndiweni ukuba ayepika entolongweni phose okwenyanga ezingamatshumi amabili esithi lokhu kudalwe ngezombangazwe.

UMathema, owesiqintini seWenlock esabelweni seMatabeleland South, uthi kukhona okunuka santungwana kusigwebo esaphiwa induna yeNtabazinduna uNdiweni.

Ekhuluma esemhlanganweni wokulwisana lenkohlakalo oqhutshelwe eGwanda izolo, uMathema uthe kusobala ukuthi kwangenela ezombangazwe kuloludaba.

UNdiweni ubehlezi echothoza uhulumende kaMongameli Emmerson Mnangagwa phambilini kokugwetshwa kwakhe. Amagqwetha kaNdiweni sehambise loludaba emthethwandaba waphezulu oweHigh Court elwisa ukuthi uNdiweni akhululwe.

UMathema uphinde wasola inkokheli zombangazwe ngokufuna ukuncindezela uzulu ikakhulu kwezokugejwa kwegolide kulumhlubulo welizwe.

Kusenjalo, uzulu emaphandleni sebhekane lendlala embi kulesisabelo njalo inkokheli zithi sokufike isikhathi sokuthi uhulumende aholise umumbu wonke nje umuntu osemaphandleni.

Indlala le iza ngesikhathi sekulokusilela komumbu elizweni kanye lokuqonga kwentengo yempuphu kuthi uzulu emakhaya useholiswa inyawuthi.

UMnu. Phineas Maphosa, ukhansila kaWard 14 eGuyu, uthi isimo sesisibi emakhaya.

“Isimo sendlala sikhulu kakhulu ukudla okubuyayo kuncinyani kakhulu ngoba abantu esibakhangeleleyo abahola okwakhathesi abathola ukudla okuthiwa ngamavulnerables balutshwane kakhulu, esikukhangelayo ikakhulu khathesi ngendlala esilayo nga bonke nje abantu bayazuza ngoba sekusiba nzima kubo abantu ukuthi bakuthole ukudla ngoba abanye lezimali azitholakali, imisebenzi ayitholakali okungangokuthi kubanzima ukuthi akuzuze ukudla lemuli yakhe.”

UNkosikazi Santa Ncube oweSitezi uthi bathwala nzima ngendleko zokuthwala amabele lawa bewasusa lapho afikela khona bewasa emakhaya abo.

“Amabele ayafika eSimbumbumbu adlula kithi emnyango wethu khonapho. ISimbumbumbu ngeyinye iWard, uWard 7, so thina amabele besiwabhadalela kabili sakubona ukuthi asikwenelisi ngoba imali vele asilayo. So, ukusuka eGwanda usiya eSimbumbumbu kuthiwa yi$18, ukuthi siwasuse eSimbumbumbu esiza kithi wona edlule kithi yi$15.”

Abantu abedlula izigidi ezimbili kuleli inengi kungelemaphandleni lizafuna uncedo lokudla kulandela ukungani kuhle kwezulu nyakenye. UMnu. Eugene Dube, oyingcwethi kwezokulima esebenza eAgriseeds, ukhuthaza abalimi ukuthi balime izilimo ezingafuni izulu elinengi ezifana lamabele.

“Ibele okuthiwa yiWedza alidliwa zinyoni lelibele ngenxa yokutshintsha komkhathi okukhona elizweni sikhuthaza abalimi ukuthi balime amabele balime lomumbu ophangisayo. Sikhuthaza ukuthi abalimi balime futhi lenyawuthi ngoba inyawuthi noma izulu lililutshwane kanjani bayavuna kuphela.”

Loba uhulumende ephethe esithi uzathatha amanyathelo ukuze uzulu engabulawa yindlala, akula asekwenzile ukunqabela indlala emaphandleni.

Facebook Forum

XS
SM
MD
LG