amalinks wokungena

Breaking News

Kuphuma Inkuthazo Yokuthi Usuku Olwatshona uJoshua Nkomo Libe Likhefu


Umuyi uMnu. Joshua Mqabuko Nkomo

Uzulu weZimbabwe umanyene ekhumbula iqhawe lesizwe, uMnu Joshua Mqabuko Nkomo owabhubha mhlaka 1 Ntulikazi ngomnyaka ka 1999.

Umuyi owayengumkhokheli owayethandwa ngabanengi kungakhathalekile ukuthi udabuka kusiphi isigaba selizwe, wayesaziwa ngamabizo amanengi othando, agoqela athi Mafukufuku, Chibwechitedza, Father Zimbabwe, Umdala wethu lamanye.

UNkomo wakhokhela amabandla akuqala ilizwe lisungula umzabalazo, afana leSouthern African National Council (SANC), iNational Democratic Party (NDP) le Zimbabwe African People’s Union (ZAPU).

Amabandla la womabili, ayengene kunkulumo zeLancaster House, zokumisa impi yenkululeko labamhlophe kweleBhilithani, emanyene njengePatriotic Front kodwa zathi inkulumo seziphelile abeZanu batshela uNkomo sokuzayiwa kukhetho luka 1980 ukuthi bancintisa bebodwa njenge Zanu ikhokhelwa ngu Mnu Robert Mugabe hatshi phansi komanyano wePF okwenza uNkomo anqotshwe.

Phakathi kuka 1982 kusiya ku 1987 kwaqhamuka ukufuthelana kwamabandla womabili eleZanu leleZapu, ibutho leFifth Brigade lathunywa ukubulala abasekeli bakaNkomo, kumbuqhazwe owanikwa isihloko esithi Gukurahundi lapho okwabulawa khona inkulungwane ezedlula amatshumi amabili.

Ngomnyaka ka 1987 emizameni yokumisa isihluku sokubulawa mahlayana kwabantu ababengahlomanga bethiwa ngabahlamuki amaDissidents, uNkomo wakhetha ukukhulumisana leZANU, okuzinkulumo ezacina ziphuma lesivumelwano sokubambana eseUnity Accord kwasekubunjwake ibandla lomanyano eleZANU PF wacina esenikwa isikhundla sokuba ngumsekeli kamongameli wesibili beloMnu. Simon Muzenda ebandleni elitsha.

Umsekeli wesikhulumeli se MDC Alliance u Mnu Felix Mafa uthi impilo kaNkomo kufuze ifundise uzulu we Zimbabwe okunengi.

“Namhlanje lilanga alapho esikhumbula ilanaga lapho intaba engu Joshua Nkomo eyadilika khona. Thina abe MDC Alliance, ethungamelwa ngu Adv Chamisa sihlala sikhumbula izifundiso esaziphiwa ngu Nkomo. Wathi lima ekhuppha ebaleni elithi imali, yikho namhla libona abantu sebephongu gcwala ilizwe lonke belima. Ngabe sakwenza kudala ngabe kungcono”

Isikhulumeli sebandla leZAPU, uMnu Iphithule Maphosa uthe uzulu we Zimbabwe katholanga ithuba lokubona uNkomo ebusa kodwa kufuze alandele izifiso zakhe ukuze ilizwe liphumelele.

“Sathandazela umsindiso okweminyaka eminengi weza engu Joshua Nkomo wangalalelwa uNkomo weyiswa kakhulu. Wagijinyiswa efuna ukubulawa kodwa namhlanje siyananzelela ukuba konke ayekukhuluma, ayekwenza yikho okumele sikwenze ukuze siphumelele njengelizwe.

Omele abatsha kubandla le ZANU PF koBulawayo uMnu Munashe Mtutsa uthi intsha kufuze imfunde imisebenzi ka Nkomo eyokuzinikela.

“Ubaba uNkomo ube engomunye wabasunguli bempi eZimbabwe. Wasitshiyela ithuba lokuba ngabantu abazibusayo. Watsho ukuba thina njengabatsha ilizwe akumelanga ilizwe life thina sikhona. Nxa kusenza ngabe uhulumende wenza ilanga likamhlaka 1 July libe likhefu.

Lanxa kwaba labanye ababekuZapu ababesithi waphambanisa ngokungena kusivumelwano seUnity Accord ngoba wenza ibandla leZapu ukuthi liginywe ngeleZanu, abanengi bazwisisa ayekutsho ngaleso sikhathi ukuthi wayezama ukuvimba ukutshabalaliswa kwesizwe sikaMthwakazi esasesihlaselwe kakubi empini yeGukurahundi.

Abanengi bathi ilanga likamhlaka 1 Ntulikazi kumele libe likhefu ukuze intsha icabangisise ngokuqhubekisa phambili imibono eyayikhuthazwa ngumuyi lokuzinikela kwakhe ukukhulula eleZimbabwe lakho konke okwenziwa nguNkomo esaphila okwakuyisibonelo esihle leqhawe lamaqhawe.

Facebook Forum

XS
SM
MD
LG