Kulekombi ebhewukileyo ibalekela amapholisa ekade ezama ukuyipontshisa ngameva ensimbi, amaspikes eHarare ngoLwesine kwalimala abantwana besikolo.
Ukusetshenziswa kwamaspikes yindaba esihluphile elizweni esike yahluzwa ngitsho lasedale lephalamende.
Umkhokheli wamapholisa uPolice Commissioner Augustine Chihuri utshele leli dale ukuthi basebenzisa ameva la njengendlela yokuzivikela kubatshayeli abangaba bezama ukubagxoba bebalekela amaroad blocks.
Olwela amalungelo oluntu uMnu Okay Machisa wakhweza udaba lwakhe emthethwandaba ephikisa lumkhuba.
“Into enziwa ngamapholisa ayiqondanga,” kutsho ummeli weNkayi South edale lephalamende uMnu. Abednico Bhebhe.
“Amaspikes la sebulalise abantu abanengi kakhulu; uhulumende laye izandla zakhe zibomvu ngoba nguye othuma amapholisa la ukuthi ayedinga imali.”
Ukubhewuka kwalikombi kucunule uzulu weHarare obikwa eqale ukulwisana lamapholisa.
Ekulwisaneni lokhu amapholisa ajikele intuthu ehitshayo ezitaladeni aseqala ukutshaya abantu mahlayana nje.
Omunye wabahitshwe yitear gas, uMnu, Promise Mkhwanazi oyisikhulumeli senhlanganiso yeTajamuka/Sesijikile, utshele iStudio 7 ukuthi ubengasenelisi ukuphefumula kuhle.