amalinks wokungena

Breaking News

Kuqhubekela Phambili Ukusilela Kwemali Lempahla Etshiyeneyo


FILE: Abathenga bethengisa impahla emigwaqweni kabasakwazi abakwenzayo, Sept.17, 2015.

Kuqhubekela phambili ukuswelakala kwemali eZimbabwe lokukhuphuka kwentengo yempahla etshiyeneyo. Ngesikhathi esifanayo, ayasilela amafutha okupheka, itshukela, amanamunede lesinkwa.

Ukuswelakala kwempahla ezitolo kuqhubekela phambili njalo labantu sebethenga buthumuthumu besenzela ukuyagcina abakutholayo emakhaya kumbe ukuthi baphinde bathengise emkambo wensitha.

UMnu. Nqobizitha Ndlovu, umphathintambo wezamafekithali, usanda kutshela intathelizindaba kungxoxo mpikiswano eyethulwe ngumsakazo weVoice of America leZimpapers TV Network ukuthi uhulumende uyazama ukulungisa isimo esibi somnotho, ikakhulu ukudinga imali yokuvuselela amafekithali azakwenza kube lempahla enengi ezathengiswa kwamanye amazwe.

UNdlovu uthi abantu kumele babekwazi ukuthi ukuzamazama kwemikambo yemali yikho okwenza ukuthi kube lokusilela kwempahla njalo eyinye ikhuphuke intengo okungapheliyo.

Uthi imali yohlobo lwama bond notes ledola leMelika kuyalingana.

Kodwa-ke akunjalo emigwaqweni lapho okuthengiswa khona idola leMelika ngama bond notes akhuphukileyo. Lokhu kwenza ukuthi imali igugudeke isisindo isesikhwameni somuntu.

UMnu. Lungelo Ndebele, okhulume lomsakazo weStudio 7 ngesikhathi edinga amafutha okupheka, uthi sokuhlupha ukuthwala imali kwele Zimbabwe.

“Khathesi isimo esisibonayo ngiyabona senza kube nzima ukuthi umuntu abe lebudget ngakho kucina kusikhathaza ukuthi siyangaphi njengelizwe kumbe sesibuyela lapha esavela khona.”

UNkosikazi Nothabo Nyathi, esinye isakhamuzi sakoBulawayo, uthi okunye okunjengezilimo kulokhe kusatholakala ngentengo efanayo ngoba abakuthengisayo besaba ukuthi kungabola kungakhuphuka intengo.

“Amakhabitshi lamatamatisi lokhe kutholakala ngoba yikho osekuyisitshebo njalo akukhwelanga kangako intengo. Ukutholakala kuyatholakala akuhluphi kangako.”

Usomabhizimusi wakoBulawayo, uNkosazana Ruth Moyo, uthi bahlala bekhuphula intengo yempahla ngenxa yokuthi yikho kanye okwenzakala lapho abathenga khona impahla etshiyeneyo.

“Impahla azisela ntengo eyodwa okuyinto eyenza kubenzima ukusebenza ngoba intengo intshintsha nsukuzonke. Lapha esithenga khona kungakhwela kuyamele lathi sikhweze ngokufanayo.”

Intsha yona ithi abakhokheli kungenzeka ukuthi bengabe bengaselamacebo kodwa kuhle ukuthi abantu bebambane kungakhathalekile ibandla abavela kulo. Lokhu kukhulunywe ngelinye ilunga labatsha elikuhlangothi lweZANU PF Youth League, uMkhokheli Dube.

“Isimo lesi asilani lokuthi umuntu ngowebandla leZanu kumbe ele MDC ngoba singena sitolo sinye njalo sonke sise Zimbabwe. Abakhokheli bengabe belamacebo kodwa sokumele sibambane njengabantwana beZimbabwe.”

Ohlaziya ezomnotho, uMnu. Sivumo Dlodlo, uthi uhulumende kasela macebo okulungisa ezomnotho. Ugcizelele esithi kumele umthetho ufane kubo bonke abamabhizimusi, ikakhulu ekuthengiseni imali yakwamanye amazwe.

“Uhulumende akumelanga ebandlulule abantu kumele akhangele wonke umuntu ngendlela efanayo ikakhulu laba abaphezulu abathengisa ngeForex kodwa abezitolo ezincane kuthiwa bengakwenzi lokhu.”

Kwezinye indawo abantu bacelwa ukuthi bathenge amanamunede lokunye okunenginengi bengakathengi isinkwa, amafutha okupheka lokunye.

Intengo yamafutha okupheka esemthethweni yi$3.70 igabha lesilinganiso sama liters amabili – 2 liters - kodwa kwezinye izitolo umuntu kumele akhokhe itshumi lamadola - $10 - kusiya phezulu njalo izitolo eziwatholayo amafutha zithengisa igabha elilodwa umuntu munye ngamunye nxa esethenge impahla ezedlula amadola angamatshumi.

Facebook Forum

XS
SM
MD
LG