amalinks wokungena

Kuqhutshwa Uhlelo Lokuphathisa Abadlali Benguqu Abangaqhatshwanga

  • Joseph Njanji

Banengi abangene kuhlelo lokuncedisa abadlali abangela maqembu enguqu.

Inhlanganiso ye Footballers Union of Zimbabwe iqhuba uhlelo lokuphathisa abadlali bomdlalo wenguqu abangaqhatshwanga ukuba bethole amaqembu amatsha okudlalela.

Uhlelo lolu luqale ngoLwesibili kulabadlali abangamatshumi amane lesikhombisa abagoqela abadlali abakade bedlala kusigaba saphezulu ababalisa uMoses Gutu obedlala kuqembu le How Mine, kanye lo Julius Daudi obedlalela iqembu le Highlanders.

NgoLwesithathu inani labadlali likhuphukile layafika kumatshumi ayisithupha okuyisehlakalo isiphathamandla se FUZ, uNomsa “Boyz” Moyo, athi kuyabathokozisa njengenhlanganiso.

“Abafana ababuyileyo inani lakhona liyathembisa njengalokhu ebesikukhangelele. Sinxuse inkokheli zamaqembu atshiyeneyo ukuba bebekhona njalo inengi labaqeqetshi bathi bazakuba khona ngoMgqibelo lapho abafana laba abazadlala khona lelinye lamaqembu akhonapha koBulawayo.”

Omunye wabaqeqetshi obekhona ngoLwesithathu nguJohanes Ngodzo osebenzela iqembu le Bantu Rovers. UNgodzo uthe inhlanganiso ye FUZ yenza into enhle kakhulu njalo loluhlelo kumele lwenziwe mihla ngemihla.

“Uhlelo lolu kumele luhlalwe lusenziwa ukuze abadlali abayabe bengela ama contract njalo abaqeqetshi kumele babuye ngobunengi ngoba bengazitholela abadlali abalethalenta.”

Bekukhona njalo owayengumdlali weqembu le Highlanders kanye leqembu lesizwe elamaWarriors, uRichard Choruma, osesebenza labadlali eyi football agent.

UChoruma ucebise inhlanganiso ye FUZ ukuba ixege abadlali bengqikilane enkundleni hatshi ukwala belokhu bezilolonga ukuze abaqeqetshi bebabone ngcono.

“Uhlelo lolu luhle kakhulu kubadlali abadinga umsebenzi ngoba lubapha ithuba lokuba beqhatshwe kodwa isikhalazo esikhona yikuba imidlalo ye 11 v 11 kayikho ngoba kuba lula kubaqeqetshi ukuba besuthiseke ngomdlali nxa edlala kuyi 11 v 11.”

Uhlelo lwe ‘Out of Contract Training Camp’ luqhutshelwa endaweni ye Heath Streak Multi-Sports Centre eselokitshini leSuburbs.

Loluhlelo luqhutshwe edolobheni le Harare ensukwini ezedluleyo njalo kulabadlali abambalwa abathethwe ngamaqembu adlala kusigaba se PSL.

XS
SM
MD
LG