amalinks wokungena

Breaking News

Kuqhutshwa Umhlangano Wezifundo Eziphathelane Lezempilakahle eKadoma


Abogatsha lwezempilakahle kuhlangothi lwe Aids and TB Programe besebenzelana labenhlanganiso ye HEALTHQUAL International Centre for Disease Control and Prevention Zimbabwe, CDC baqhuba uhlelo lwensuku ezimbili lwemfundiso phezu kokuthuthukiswa kwezempilakahle kakhulukazi endabeni eziphathelene legciwane kanye lengculaza emhlanganweni owenzelwa eKadoma Hotel.

Okhokhela uhlangothi olubona ngezempilakahle enhlanganisweni ye CDC u Dr Peter Kilmarx utshele intathelizindaba ezingene lumhlangano ogqitshwa ngoLwesihlanu kuyonale iviki,ukuba loluhlelo osulukusigaba esibili luhlose ukuthuthukisa umsebenzi wezempilakahle.

Bangamatshumi amabili abangene lumhlangano walesi sigaba sesibili sokuqhuba loluhlelo lokutholisa imfundiso ngaphansi kosizo oluvelele esikhwameni se PEPFAR, ngenjongo yokuqinisa imisebenzi yokuthuthukiswa kohlangothi lwezempilakahle.

Iqula lakuqala labangamatshumi amabili labodokotela bezabelo litholiswe izifundo ezifanayo kusukela mhla ka 12 kusiyafika umhlaka 21 kuyonale inyanga kaMbimbitho.

Lokhu kugcizelelwe ngumqondisi wohlangothi olubona ngezokuthuthukiswa kwenhlelo kugatsha lwezempilakahle kanye lokulondolozwa kwabantwana u Dr Josephine Chiware oveze ukuba loluhleo luzakuqutshwa kuzo zonke izibhedlela elizweni.

Loluhlelo oluqale ngomnyaka ka 2011 lubikwa luhlose ukuqhuba izifundo ezifanayo kunkokheli zezibhedlela zonke elizweni. Balikhulu elilamatshumi amane ( 140 ) okwamanje asebethe benza lezi zifundo bevelela ezibhedlela phose ezingamatshumi amane- 38 facilities.

Loluhlelo lweminyaka emihlanu lukhangelelwe ukuba usiyaphela umnyaka lube selufinyelele amatshumi edlula ayisitshigalombili( 83 ) ezibhedlela njalo luthi lusiyaphela selufinyelele amakhulu amathathu alamatshumi amahlanu.

Bekuqhutshwa njalo olunye uhlelo eweteleni inye, lokuphathisana lenkokheli zezigaba olutholiswa usizo njalo ngabe CDC njalo belukhokhelwa ngabe National Aids Council kuphume imibono ebigcizelela ukuqakatheka kokutholisa lezonkokheli ezibhedlela zezigaba ( District Medical Officers ) ukuba banelise ukuqhuba umsebenzi ngendlela elohlonzi.

Obona ngezokuhlolisisa phezu kokuqhutshwa kwenhlelo enhlanganisweni ye NAC umnumzana Amon Mpofu ( Monitoring and Evaluation Director ) utshele intathelizindaba ukuba bakubone kumqoka ukuqhuba loluhlelo.

Abe NAC bathi lumhlangano oqhitshwe ngoLwesithathu bewuhlose ukuqakathekisa indlela inkokheli lezisebenzi abasebenza ngayo ezibhedlela.

Bathi bahlezi imihlangano ukuze kwazakale ukuba abasebenza ezibhedlela laba babhekane lenkinga bani njalo bahlangana lendubo zaluphi uhlobo.
XS
SM
MD
LG