UMnu. Constantino Chiwenga loMnu. Kembo Mohadi ngoLwesine bafungiswe nguChief Justice Luke Malaba eState House eHarare ukuba ngabasekeli bakaMongameli Emmerson Mnangagwa.
Ababili laba bekumele bafungiswe okusemthethweni bengakaqalisi umsebenzi njengalokho okumunyethwe yisisekelo sombuso welizwe leZimbabwe.
UChiwenga loMohadi bakhethwa nguMnangagwa kulandela ukususwa kukaMnu. Robert Mugabe esikhundleni nyakenye libutho libambisana ledale lephalamende.
Kodwa-ke ukubiselwa kwabo ezikhundleni lezi kusolwe ngezinye izizalwane zeZimbabwe ezithi kaziboni ukuthi ababili laba bazakwenzelani ilizwe leZimbabwe.
Omunye wabasola ukukhethwa kwabo nguMnu. Thembelihle Mabhena othi ubekhangelele ukuthi uMnangagwa uzadinga abantu abatsha abagoqela owesifazana.
“Lapha siqeda kubona ukubekwa esihlalweni kwabasekeli bakamongameli, abasekeli ababili uChiwenga loMohadi. Thina besibona angani bazantshintsha kumbe betshiye oyedwa wabo kumbe befake ongumama kodwa kukhanya angani balokhu befaka abantu abafanayo. Ngakho-ke asikwazi lokhu vele sekusenze saba lokukhonona ukuthi loba ikhabhinethi ezafakwa sibona angani kuzakuba ngabantu abafanayo ngakho akulanto ezantshintsha lapha ngokubona kwami.”
UMnangagwa ekuqaleni komnyaka uthembise ukuthi uzaguqula inengi labantu bedale lakhe labaphathintambo bakahulumende ele khabhinethi kungaphela ukhetho esithi ufuna ukusala labantu abakhuthalele umsebenzi.
Ngakho-ke ukugcotshwa kwababili laba sekutshiye inengi limangele ukuthi kungabe kuyini abakwenzileyo okuveza ukukhuthala kwabo.