amalinks wokungena

Breaking News

Kusungulwa Umthethwandaba weVictim Friendly Court eTsholotsho


Justice
Justice
Izakhamizi zemangweni weTsholotsho sezamukele ukuvulwa komthemthwandaba wokuthetha amacala okudlwangulwa kwabesifazana lamantombazana, iVictim Friendly Court, okhangelelwe ukuphathisa abadinga usizo inengi labo ebelisehluleka ukuthola uncedo ngenxa yokuthi amacala ebethethwa edolobheni lakoBulawayo elikhatshana lalapho abahlala khona.

Uhlangothi olukhangela ezemithetho iJustice Service Commission luthi lukhangelele ukuvula imithethwandaba enje engamatshumi amathathu emaphandleni kweleZimbabawe, kulandela ukuqonga kwenani labantu, ikakhulu abantwana, abadlwangulwayo.

Umahluli omkhulu umnumzana Mishrod Guvamombe, uthi inengi labantu elidlwanguliweyo belihamba imimango emide ukuze liyethola uncedo njalo imithethwandaba eminengi ayakhwanga ngendlela evumela abadlwanguliweyo ukuthi baphe ubufakazi bengakhangelananga lalabo ababadlwangulileyo okwenza bazwe ubuhlungu ngamandla abanye baze bakhethe ukutshiyana lodaba lwakhona.

Uthi ukuvulwa komthemthwandaba lo kuyingxenye yemizamo yeJSC ukugcwalisa izibopho zokusa umthetho ebantwini ukuze amacala aphange ukuthethwa ngomantshi.

UNkosikazi Magugu Nkolomi, oyisakhamuzi, uthi amaVictim Friendly Courts yindlela enhle yokuthi abesifazana labantwana bathole usizo ngoba indaba yonakala emapholiseni angela sineke sokukhulumisana labantu abadlwanguliweyo nxa bethe bayadinga uncedo.

Uthi esikhathini esinengi basuka babuzwe imbuzo enzima phakathi kukazulu okusuka kubafake ihlazo, kubazwise ubuhlungu ngamandla kodwa lokhu kulakho ukuphela ngoba amapholisa asebenza kuvictim friendly unit ayafundiswa ukuthi aphathe njani abantu.

Osebenza labantu abadlwanguliweyo, uNkosazana Melody Sobantu, uthi sebekhangelele ukuthi iJSC ikhangele njalo udubo lokuphanjaniswa kobufakazi bokudlwangulwa obuhlaliswa endaweni ezingafanelanga bucine bungasamukeleki emthethwandaba.

Amapholisa amanengi emaphandleni kawalandawo yokugcina ubufakazi bokudlwangulwa obucina bufakwe ndawonye lobunye ubufakazi nje obugoqela impahla ezintshontshiweyo okucina kuphambanisa lokhu okuthiwa yiDNA eqakathekileyo ukubamba lowo odlwangulileyo.

IJSC seyayakha imithethwandaba yeVictim Friendly Courts eGuruve, eMutoko, eMurewa, eNorton kuthi Esigodini ikhangelelwe ukuvulwa kumaviki amabili azayo.

Eminyakeni emibili ezayo kukhangelelwe njalo ukuthi amaVictim Friendly Courts abe esevuliwe eNkayi, eBinga kanye leVictoria Falls, ephathiswa ngoncedo lwemali evele enhlanganisweni yePlan Zimbabwe.

Amacala abantwana abadlwangulwayo kuthulwa ayanda emphakathini okuvezwe ludaba lukababa obikwa ebethwalise abantwabakhe abangamantombazana labangani babo amagabha avuzayo emangweni weBezha eMzingwane okweminyaka edlula elitshumi engabotshwanga.
XS
SM
MD
LG