amalinks wokungena

Breaking News

Kuvaleliswa Izifundi Eziya Emakolitshini eMelika


UMnu. Bruce Mr. Wharton lezifundi eziya eMelika. (Photo: US Embassy)
Izifundi phose ezingamatshumi amathathu – 28 eziphiwe izigidi eziyisithupha zamadollar - $6 million yokuyafunda emakolitshini atshiyeneyo eMelika zivaleliswe ngabammeli beMelika kwele Zimbabwe ngoMvulo.

Izifundi lezi ezingenelisi ukubhadalelwa indleko yemfundo ngabazali ngenxa yokuswela imali zithole uncedo lokuyafunda ngoncedo lwemali evele esikhwameni sohlelo lweUnited States Achievers Program-USAP, osoluleminyaka elitshumi lane – 14 lwasungulwa eZimbabwe.

Uhlelo lolu olunceda abantwana abakhaliphileyo abengenelisi ukubhadalela imfundo, solusabalale kwamanye amazwe. Solwanceda abantwana abedlula inkulungwane lamakhulu amabili – 1,200 selokhe lwasungulwa eZimbabwe.

Ummeli weMelika eZimbabwe, uMnu. Bruce Wharton, utshele izifundi lezi ukuthi uhlelo lolu soluvulele amathuba amangalisayo abantwana abanengi eMelika le Zimbabwe.

Omunye wazifundi lezi, uNkosazana Charity Bhebhe, odabuka eMatabeleland North ozabe efunda ekolitshini le Arizona State University lapho azabe efundela khona ezempilo, uthe uzabuyela kwele Zimbabwe engaqeda izifundo zakhe ukwenzela ukuthi ancede isizwe sakhe.

Ingcwethi ecubungula ezemfundo, uMnu. Thandeko Zinti Mnkandla, uthi uhlelo lolu luyabukeka loba nje izifundi lezi zizathwala nzima nxa sezibuyele eZimbabwe njengoba kungela msebenzi elizweni.
XS
SM
MD
LG