Inkulungwane lenkulungwane zabantu ngoLwesihlanu bezithe gwaqa enkundleni yeWhite City Stadium koBulawayo embuthanweni womthandazo wokuvalelisa iqhawe lesizwe elalwa impi yenkululeko ekuviyo lebutho eleZipra, uDokotela Dumiso Dabengwa, obhubhe ngoLwesine ngeviki ephelileyo kwele Kenya esendleleni yokuphindela ekhaya, evela kwelatshwa kwele India.
lzikhulumi zonke eziphiwe ithuba embuthanweni lo, zichaze umuyi njengendoda ebilesibindi, elozwelo yazidela njalo ebhubhe iphila labantu.
Osaphethe isikhundla sokukhokhela ibandla leZAPU ebelikhokhelwa ngumuyi, uMnu. Isaac Mabuka, uthi intaba enkulu idilikile.
“Ukuhamba kukaDD kuyasidanisa sonke njengenhlanganiso kodwa kusitshiya sisemumweni wokuthi sisebenze sisiyaphambili …”
UMnu. Buster Gwizi, isikhulumeli sebutho leZIPRA, ucele uhulumende ukuba abahloniphe ngokubuyisela impahla yabo ayithumbayo.
“Ilizwe lilahlekelwe. ukuhamba kwakhe kutshiye isikhala ngoba ubezehlisa kakhulu. Thina amaZIPRA sifuna yonke impahla yethu eyathunjwa nguhulumende ukuze lathi siphile njalo lenkomo zethu lamathole azo siyakufuna.''
UMqondisi wenhlanganiso yeDumiso Dabengwa Foundation, uMnu. Mthulisi Hanana, uthi umuyi kunengi obekumkhuba ngohulumende lo okhona.
“UBaba uDabengwa kulento ezinengi akade ezikholwela. UBaba ufe engumuntu olobuhlungu enhlizweni ngoba kulento ezinengi ezimbi uhulumende amhlukumeza ngazo abanye abalweli baphiwa amapulazi kodwa yena wazithengela, imali yakhe yepension kayitholanga njalo wabotshwa wahlala ejele engelacala.”
UMnu. Sibangilizwe Nkomo, indodana kamuyi yowayengumsekeli kamongameli weZimbabwe njalo engumongameli weZAPU uDokothela Joshua Mqabuko Nkomo, uthe isizwe silahlekelwe liqhawe lamaqhawe elitshonele emangweni ngenxa yesimo esibi kwezempilakahle eZimbabwe. UMnu. Roma Nyathi, osebenze lomuyi kwezombusazwe okwesikhathi eside, uthe intanga esakhulayo kayifunde ngempilo kamuyi.
“Utshiye isikhala esikhulu kodwa singakuthini siyazalwa sedlule emhlabeni, intanga ekhulayo ayifunde ukuthi uDumiso wayeziphethe njani ikakhulu laba abafuna ukungena kwezepolitiki, ubengumuntu wabantu. Siyadana ngalababantu abehluleke ukumhlonipha ngoba besephalamende nje nguye, kutsho ukuthi lokhe kulabantu abalenzondo ngokuthi ubekubandla leZAPU."
Induna uGampu uthe balahlekelwe ngumthunzi, umuntu obesenelisa ukukhuza umsindo abantu balalele.
“Sizwa silokudana okukhulu kakhulu silahlekelwe liqhawe, umthunzi. Abadala laba bebekhuza, bebekhuluma isizwe sizwe silalele ngizwa ngisethuka ukuba ulaka oluzayo sizalukhuza njani, ilizwe aliphathwanga kuhle lokhe besafuthelene ikakhulu ngodaba lombhuqazwe weGukurahundi. Lathi njengezinduna sizakhokhela nzima.
“Umuyi ubezithobile kodwa engatshiphanga ubenjengemvu kodwa ebengasosithutha ubezithoba ezehlisa, lami ubengihlonipha lamakhosi onke, silahlekelwe njenge Africa siyakhala kakhulu njengezinduna ulifele lelilizwe, ubutsha bakhe buphelele ekukhululeni ilizwe leli, alehlanga kungehlanga.”
Ngomgqibelo, uDabengwa uyakuyabekwa ekhaya lapho adabuka khona eManxeleni, eNtabazinduna.
Isidumbu sikamuyi ngoLwesihlanu sizalaliswa emzini wakhe lapho abantu ababuthene khona koBulawayo. Isidumbu sakhe ngoMgqibelo ekuseni sizathwalwa yindizamtshina yebutho esesiyabekwa lapho akhetha khona esaphila.
Umuyi utshiye umkakhe, uNkosikazi Zodwa Dabengwa, abantwana labazukulu.
Uzulu unxusiwe ukuba aze ngobunengi ngoMgqibelo kuhambo lukaDabengwa lokucina, esesiyabekwa eNtabazinduna.
Kuzabe lezimota ezizathwala abantu kungelanhlawulo.