amalinks wokungena

Breaking News

Kuvalwa Inkantolo Ezinengi eZimbabwe Kulandela Ukumemetheka Ngamandla Kwegciwane leCOVID-19


Abekhomishini ebona ngezemithethwandaba elizweni eyeJudiciary Services Commission (JSC) sebevale ezinye inkantolo emadolobheni lesigabeni elizwe ngenxa yokumemetheka kwegciwane leCOVID-19.

Imthethwandaba le igoqela eseKariba, Chinhoyi, Karoi, Bindura, Mutare Magistrates’ Court leHigh Court lamanye.

Embikweni wabo abawethule enkundleni yokukhulumisana lozulu enkundleni yeTwitter, iJSC ithe izama ukuvikela izisebenzi labantu ekuthapheni umkhuhlane weCOVID-19.

Isiphathamandla seJSC, esingathandanga ukuthatshwa amazwi, uNkosikazi Bianca Makwande, ugcizelele umbiko olotshwe ngunobhala wohlangothi lwezemithetho, uMnu. Walter Chikwanha, esithi lelinyathelo lethathelwe ukulondoloza impilakahle yezisebenzi zemithethwandaba kanye lozulu jikelele.

Uphinde wathi lelinyathelo lithethwe ukuze bathole ithuba lokufafaza imuthi kanye lokulonda abangabe bethe baba seduze kwabantu laba abatholakale bele COVID-19.

Omunye wabaphatheke kumikhankaso yokulwela ilungelo loluntu, uMnu. Pride Mukono, uyalincoma lelinyathelo elithethwe ngabemthethwandaba.

“Ngivumelana lakho ngoba iCOVID-19 ligciwane elibulalayo sibili sibona abantu abanengi besifa, abanengi bakhona bebanjwa yilesi sifo, begula kakhulu sibili, kungatholakali amaOxygene wokuthi baphile. So hatshi, ngiyavumelana lakho lokhu ngoba yinto yokuthi imlipo yabantu iqakathekile ukwedlula ukuthethwa kwamacala.”

Kwasekelwa nguMnu. Effie Dlela Ncube, omunye njalo wabaphatheke kumikhankaso yokulwela ilungelo loluntu.

“Kulengozi enkulu sibili ukuthi igciwane leCORONAVIRUS selingagcwala indawo yonke libulale abantu abanengi kakhulu ukwedlula labo eselibabulele ngalesi sikhathi. Nxa ngabe i-Government ingathathanga amanyathelo azavikela abantu ngendlela enkulu, kulama Lockdown lawa abahlala bewenza, ukuthi sonke isikhathi igciwane lingaba engathi liyaqansa, sekusiba yilockdown, lockdown, lockdown, lockdown, hayi.

"Kudingeka indlela ezihlakaniphileyo zokuvikela lokho, indlela ezizafundisa bantu, zicebisane labantu ingozi ekhona njalo kwandiswe ukuhlatshwa kwabantu ngokuba imithi leyana iyashota. Kudingeka abantu bahlatshwe, bahlatshwe, bahlatshwe, bafundiswe, bafundiswe, bafundiswe, ngaleyondlela bazavikeleka.”

Eyinye ingcwethi kwezempilakahle eyisiphathamandla sesibhedlela seMpilo Central Hospital, uSikhwicamfundo Solwayo Ngwenya, uthi kumele abantu baqaphele umkhakha omutsha wegciwane leCOVID-19 obulala abantu abanengi.

“Yikho siyaxwayisa ukuthi linanzelele kakhulu mahlabezulu khonokho okukuvikela ngakho, umkhuhlane lo oweCoronviru esihlala silitshela ngawo, yikho okuqakathekileyo. Abanengi, siyaxwayisa ukuthi lihlale phansi lingatshoni lihamba, lisiyahlangana labantu, ligada amabhasi okuleziminyeminye khona, liphefumulelana labantu. Ligeze izandla njalo, lingavumi ukuti lihlangane lomuntu khiphe amakhala, liphefumulelana laye, ligqoke ama-Face Mask, kuqakathekile ukuvala amakhala lomlomo. Siyaxwayisa mahlabezulu.”

Ukhuthaza abantu uDokotela Ngwenya ukuba behlukane lomkhuba wokubuthana.

“Siyalixwayisa mahlabezulu, lapho abanompola khona abakhulu, lapho eliyabe lihlangane khona, ema-Church kumbe lisenza umtshado, kumbe lisenza okunye khonokho okuhlanganisa abantu abanengi, siyaxwayisa ukuthi lingakwenzi khonokho bantu bakithi. Lanxa lapha kusiyabekwa abantu, lingahambi libanengi, lilandele isinqumo esafakwa nguhulumende. Siyalicela mahlabezulu, sesisiya engozini embi njengobana liyabona lomqando lo usubamba, ibhubhane leli lihambelana lomqando. Selizabulala abantu okwamagama sibili, siyalixwayisa mahlabezulu. ”

Abe-JSC bathi bonke abafuna ukusa indaba zabo emithethwandaba abagoqela amagqwetha kanye lozulu jikelele, kuzamele benze lokhu ngokuxhumana laboRegistrar, uResident Magistrate, uSherrif kumbe umsekeli kaMaster of the High Court njalo uzulu uzokwaziswa ngenombolo zabo zencingo zokusebenzisa ukubathinta ngazo.

Abe Judiciary Services Commission bathi basalindele ukucetshiswa ngabezempilakahle ukuthi kuthiweni kusiya phambili ngalendaba.

Kubhubhe umuntu oyedwa ekutshoneni kwelanga layizolo ngoLwesibili phakathi kwabangamakhulu afika phose ayisitshiyagalombili - 766 abatholakale beleCovid 19.

Ndawonye sebesedlula inkulungwane ezingamatshumi amane - 43 480 esebetholakale belegcikwane leli elizweni selokhu laqhamukayo ngoMbimbitho nyakenye emazweni womhlaba okugoqela iZimbabwe. Kuthi abafika phose inkulungwane ezingamatshumi amane - 37 477 kungabasile kilo.

Kunje sebesedlula inkulungwane ezingamakhulu ayisikhombisa- 715,056, abantu asebenelise ukuhlatshwa ijekiseni yakuqala eyeCovid 19 Vaccine, eZimbabwe jikelele njalo sebezinkulungwane ezedlula amakhulu amane lengxenye-451,793, asebehlatshwe ijekiseni yesibili.

Facebook Forum

XS
SM
MD
LG