Uzulu weGwanda usele engelamanzi ezindlini kusukela ngoLwesine weviki eyedluleyo kulandela ukuvalelwa amandla kagetsi, kwenkampani kahulumende ebona ngomsebenzi wamanzi eyeZinwa, yinkampani yeZesa phezu kwesikwelede sezigidi ezilitshumi lane zamadollar-$14 million.
Abafundi besikolo seSt Christopher’s lakwezinye izikolo, babonakale sebephindela emakhaya ngehola letshumi ngoMvulo ekuseni ngoba bekungelamanzi ezikolweni lezi.
UNkosikazi Siduduzile Masilela uthi ukuvalwa kwamanzi lokhu sekuphazamisa abantwana ezifundweni.
“Ezinye izikolo sezivaliwe ngenxa yokuthi akulamanzi phezulu kokuthi abantwana abafundi ngenxa yestrike esikhona bafunda 1 or 2 days ngapha manzi sevalisile ukuthi abantwana bengafundi worse sikhangelane lesituation esikuyo isituation yeCovid 19 efuna kuhlale kulamanzi abantu begeza izandla manje sisengozini yokuthi kungaqhamuka iCholera iloba nini.”
Osaphethe isihlalo somqondisi wesibhedlela seGwanda uMnu Blessing Gwarimbo uthi balakho ukuthatha amanyathelo alukhuni nxa udubo lwamanzi lungaqhubekela phambili.
“Indaba yamanzi leyi its atime bomb ngoba sikhangele imikhuhlane enjenge Typhoid ezacina ibamba abantu njengesibhedlela lapha we are planning to discharge most of the patients.”
Lanxa iZinwa ivuma isikwelede seZesa ithi umanisipala weGwanda laye ulesikwelede kuye sezigidi ezilikhulu lamatshumi amane amadollar- $140 million, osekudale ukuthi iyehluleke ukubhadala indleko zamandla kagetsi.
UMeya wedolobho leGwanda uMnu Njabulo Siziba uthi sebexoxisane leZesa ukuthi babhadale eyinye yalimali ukuze amagetsi avulwe.
“We have had discussions with iZesa and ices they have agreed ukuthi if we can pay at least $1,5 million funa bangasivulela for which if goal posts do not change kufanele size lamanzi by tomorrow.”
Inengi lezakhamizi lisole kakhulu inyathelo elithethwe yiZesa lokuvala amagetsi eZinwa ngalesi sikhathi ilizwe lilwisana lokumemetheka kwegciwane leCoronavirus.
Abesibhedlela esikhulu saleli dolobho labo bathi balakho ukubisela izigulane emakhaya nxa loludubo lungaqhubekela phambili.
IZinwa yiyo ehlambulula amanzi edolobheni leGwanda ibisithengisela umanisipala osuka athengisele izakhamizi lawamanzi.
Okwamanje izakhamizi zikha amanzi ezikotsho lasedamu leMtshabezi.
