Abantu sebeveze imibono ehlukileyo ngenani eliphezulu elabenelise ukungenisa amaphepha abo ukuze bancintise kukhetho lokudinga umongameli, amalunga edale lephalamende kanye lamakhansila.
Isakhamuzi sakoBulawayo, uMnumzana Aleck Ndlovu uthi okwenzakale lonyaka akujwayelekanga.
“Okwenzakala kuleli ngumhlola sibe lombhuqazwe wegukurahundi, sabalokuhluthulwa kombuso manje silalokhu, abelungu balesandla kukho njalo impumela yokhetho isisazakala.”
Evumelana loNdlovu, osakhulayo uSonny Jermain uthe kukhomba ukukhululeka kwezombusazwe.
“Lokhu kuveza ukuba abantu sebekhululekile ukusukuma njalo yiyo idemocracy yakhona kodwa abantu banengi kakhulu.”
Esinye isakhamuzi sakoBulawayo, uNkosikazi Serah Mpofu-Sibanda uthi kuyamangalisa ukuthi ilizwe elincane njengeZimbabwe libe lenani elikhulu labafuna ukuncintisa.
“Kuhle okwenzakeleyo ukuza kwabantu kodwa sekusihlukumeza ngoba inani leli liphezulu njalo asisazi ukuthi bayasisebenzela kumbe sekuyikufuna ukudla.”
Osakhulayo wakoBulawayo, uLoreta Moyo uthi lokhu kuveza ukuthi abantu bafuna inguquko.
“Lokhu kuyinto enhle sekuveza ukuba abantu bafuna inguquko, bafuna iZimbabwe entsha njalo lekusasa elihle labantwababo.”
Idale elikade libhalisa amalunga edale lephalamende koBulawayo lokhu lisaphakathi kokufeza umsebenzi, okwamanje imibiko ephumayo ithi kulabantu abedlula amakhulu amabili abayenelise ukungenisa amaphepha abo, kuthi isiqinti seMawewe silabantu abangamatshumi amabili lasikhombisa abafuna ukuncintisela isikhundla sinye osekutshiye abantu bezibuza imibuzo eminengi.
IZimbabwe isifike esibangeni esiphezulu samalungiselelo okhetho olwenziwa ngoNtulikazi mhla ka 30 lonyaka.
Ngakwelinye icele abanye basele bekhala ngokuthi amagama abo esulwe kuluhlu lokungena ekhethweni kwafakwa abanye ngamabandla abo.
