amalinks wokungena

Breaking News

Kuvulwa Igalaji Elingemukeli Imali yamaBond Notes eManama eGwanda


UMnu. Abednico Ncube loNkosazana Saliwe Marema bavula okusemthethweni igalaji leManama Service Station.

UMnu. Abedinico Ncube uvule ngokusemthethweni igalaji elithengisa amafutha ezimota eManama ngedola leMelika kumbe iRand laseSouth Africa kuphela.

Zijabule zaphinda zadana izakhamizi zeManama lapho kuvulwa igalaji lamafuta ezimota elingayamkeliyo imali yohlobo lwama bond notes

Loba nje uhulumende wakuleli ephethe esithi amandla awe bond note ayalingana lawedola lakweMelika, ngoLwesihlanu umphathintambo obona ngokwenzakala eZansi yemaNdebeleni UMnu. Abedinico Ncube uvule ngokusemthethweni igalaji elithengisa amafutha ezimota eManama ngedola leMelika kumbe iRand laseSouth Africa kuphela.

UNkosazana Saliwe Marema, umnikazi weManama Service Station.
UNkosazana Saliwe Marema, umnikazi weManama Service Station.

Esethula umbiko wakhe uMnu. Ncube obengumhlonitshwa kulumkhosi uthi ukuvulwa kwaleligalaji kuveza sobala ukuthi eleZimbabwe livulile amathuba amabhizimusi phansi kombuso kaMongameli Emmerson Mnangagwa.

Kungenani lokuthi leligalaji alithathi amabond notes, uNcube uthi lizasiza uzulu kanye lengatsha zikahulumende.

Lumcimbi obuqhubeka kuhle ilanga lonke usuke waguquka ngesikhathi imota seziqala ukuthela amafutha abatshayeli beyikho betshelwa okwakuqala ukuthi leligalaji kalisoze lamkele amabond notes.

Abatshayeli bezimota, inengi labo kungabatshovisayo bebefike emadabukakusa kuleligalaji belethemba lokuthi bazathela lawamafutha asetholakala nzima kulezinsuku.

Ihlekana labatshayeli bemitshova lisuke layacela uMnu. Ncube ukuthi angenele kuloludaba kodwa kubikwa ethe laye kungaphezulu kwamandla akhe. Sixhumane labanye besidla amalahle.

Abatshayeli laba abatshengisele ukukhonona kwabo ngokuvimba leligalaji ngezimota bacine bethelelwa amafutha la nge $2 yamabond ukuze basuke kodwa imbiko esilayo iveza ukuthi abasaphindanga bathatha amabond kusukela khonapho.

UKhansila kaWard 17 uMnu Ephraim Nyathi uthi ulethemba lokuthi ukuvulwa kwaleligalaji kuzathuthukisa isigaba seManama.

Imbongi elodumo uLerato Ndlovu owaziwa ngokuthi nguNqindi ubekhona laye emcimbini lo.
Imbongi elodumo uLerato Ndlovu owaziwa ngokuthi nguNqindi ubekhona laye emcimbini lo.

UMqondisi weToppik Investments abanikazi beManama Service Station uMnu Tisetso Sebata uthi labo bathenge amafutha ezimota ngemali yakwamanye amazwe.

Inengi labathengisayo kulezinsuku alisayamkeli amabond notes osekudale ukuthi inengi lezisebenzi kuleli lithi selifuna ukuhola idola leMelika.

Amandla ebond note aqhubeka esiwa mihla ngemihla lapho kuqathaniswa ledola lakweMelika.Ukusilela kwempahla ezitolo kanye lamafutha ezimota kuqhubekela phambili lanxa uhulumende wakuleli ephethe esithi kuzalunga.

Facebook Forum

XS
SM
MD
LG